A cidade de Gramado, no estado brasileiro de Río Grande do Sul, acolleu  o encontro turístico Festuris, no que Turismo de Galicia presentou a oferta turística galega aos operadores turísticos máis importantes dos sur de Brasil.

Festuris celebrou a súa 29 edición no recinto Serra Park de Feiras e Eventos dedicada só a axentes de viaxes que tiveron a oportunidade de coñecer ou afondar no coñecemento dos produtos e servizos turísticos galegos de cara á organización de viaxes con destino Galicia.

Este certame é un dos máis interesantes dos que se celebran no país brasileiro e adoita ser visitado por unha 15.000 persoas.

Este ano, Turismo de Galicia participou na feira cun recinto propio de 24 metros cadrados no que ten como protagonista especial ao Camiño de Santiago.

Demanda turística e de peregrinos

Canto á demanda turística, o mercado americano, agás EEUU, presenta un comportamento positivo ao longo do ano 2017 no ámbito hoteleiro.

Así, rexistra un incremento do 14,5% na cifra de viaxeiros aloxados e do 14,9% no nivel de pernoitas, en relación ao mesmo período do pasado ano.

Este segmento representa o 12,4% do total internacional, incrementando o seu peso en 0,6 puntos en relación ao pasado ano.

Polo que respecta ao número de peregrinos, no que vai de ano xa son preto de 5.000 os brasileiros que recibiron a Compostela, o que supón un incremento do 16% en relación ao mesmo período do ano anterior.