Despois de que o pasado outubro se consolidase como o mes no que máis medrou o turismo galego -cun incremento do 6%- Galicia volve demostrar que esta suba se está a rexistrar de xeito sostido no conxunto do ano, respondendo ao seu modelo de crecemento ordenado e planificado.

Nos dez primeiros meses, a Comunidade galega logrou superar os 4,6 millóns de viaxeiros, cifra nunca antes alcanzada a estas alturas de 2017 e suma, deste xeito, cinco anos consecutivos de crecemento turístico. Así se desprende dos datos feitos públicos polo Instituto Nacional de Estatística (INE) referidos á ocupación nos establecementos regrados da nosa Comunidade, que inclúe hoteis, pensións, apartamentos turísticos, cámpings e casas de turismo rural.

Este bo comportamento á alza dos viaxeiros durante estes dez primeiros meses do ano repítese tamén no número de noites que deciden pasar en Galicia. O número de pernoitas subiu en máis dun 5%, colocando o dato final en máis de 9,7 millóns no conxunto de Galicia, tamén un máximo histórico.

Case 1,4 millóns de turistas estranxeiros

Neste período de tempo destaca especialmente o comportamento do turismo internacional, que continúa gañando peso no perfil dos viaxeiros que recibe Galicia. O número noites de visitantes estranxeiros nos establecementos regrados subiu máis dun 8% e a cifra de viaxeiros aloxados en 5,5%. Neste caso son seis anos consecutivos de incremento deste mercado, acadando agora a súa mellor cifra, con case 1,4 millóns de viaxeiros e máis de 2,3 millóns de noites.

Por tipoloxía de aloxamento, cómpre subliñar o crecemento dos hoteis, dos apartamentos turísticos e das casas de turismo rural, que ascende ao 9,6% no caso dos primeiros, que supera o 10% no caso dos segundos e que supón un crecemento do 4% nos establecementos do rural. Pola súa banda, a estadía media no conxunto da oferta aloxativa medra case un 3% con respecto ao mesmo período do ano anterior. Son xa dous anos de crecemento e permite acadar a cifra más elevada de estadía nos últimos catro anos.

Crecemento en outubro

Neste balance dos dez primeiros meses do ano teñen especial influencia os datos acadados en outubro, cunha suba do 6% na cifra de viaxeiros, ata máis de 463.000, e do 6% no de noites, ata as máis de 883.000. De feito, neste mes, Galicia lidera, xunto a Aragón, o crecemento da demanda en España no número de noites nos establecementos regrados.

A mellora vén da man fundamentalmente do turismo internacional, que medra un 10,3%, xunto ao nacional, que medra nun 4,6%. De feito, crece o peso do mercado estranxeiro, que representou en outubro máis do 35% dos viaxeiros e preto do 30% das noites.

Todos estes rexistros constatan que a Estratexia do turismo de Galicia 2020, impulsada este ano pola Xunta de Galicia en diálogo co sector, está a seguir dando mes a mes os seus froitos. Cun investimento de 240 millóns de euros, a Estratexia ten como piares a calidade e a sustentabilidade e fixa accións encamiñadas a afondar na desestacionalización dos fluxos turísticos, repartidos ao longo de todo o ano, e a especialización e diversificación da oferta e dos recursos galegos.