A directora de Turismo de Galicia, Nava Castro, participou hoxe na Cidade da Cultura na entrega de certificados de uso do novo selo Galicia, destino familiar, unha acreditación impulsada polo Clúster de Turismo de Galicia que identifica aos negocios e profesionais do sector especialmente adaptados a este mercado e que facilitan a súa experiencia turística na nosa Comunidade.

Durante o acto, Nava Castro puxo de manifesto o interese da administración autonómica por este segmento en alza, tradicionalmente interesado en Galicia e que é, ademais, un dos identificados como prioritarios na Estratexia do turismo de Galicia 2020. Deste xeito, como explicou, a folla de ruta do Goberno galego para o turismo dos vindeiros anos apoia iniciativas que contribúan a crear produtos e experiencias que teñan a este sector como público obxectivo.

Recordou que aínda que o familiar é un segmento maduro en demanda, é emerxente en oferta, polo que ofrece moitas posibilidades de crecemento. De feito comezan a xurdir novos perfís como os denominados PANK (Professional Aunt No Kids), é dicir, tíos con sobriños que están a abrir novas e interesantes posibilidades turísticas. “Temos unha grande oportunidade que debemos aproveitar”, explicou.

A directora de Turismo referiuse ás enormes opcións que ofrece Galicia, con actividades para vivir en familia asociadas ao mar, ás rías navegables todo o ano, aos parques naturais, con experiencias de turismo activo e deportivo, así como as asociadas a experiencias de turismo ornitolóxico e astronómico nos dous destinos Starlight de Galicia, o Parque Nacional das Illas Atlánticas e Pena Trevinca; ou mesmo para gozar da cultura dun xeito didáctico e ameno na rede de museos galegos.

Oferta identificada

Xunto a estes recursos, Nava Castro aplaudiu iniciativas como este novo selo Galicia destino familiar, ao por en valor a oferta galega para todos os públicos. Deste xeito, quen visite a Comunidade galega pode xa identificar claramente todos os servizos turísticos dos que Galicia dispón para viaxar en familia. No acto de hoxe obtiveron este selo un total de 28 establecementos, entre aloxamentos –que suman máis de 3.000 prazas-, locais de restauración, empresas de servizos complementarios ou axencias de viaxes. “Con esta iniciativa damos un paso máis posicionando Galicia como destino multiexperiencial e de calidade, aproveitando, ademais, que o familiar é un mercado fiel a destinos como o noso e cunha duración da estancia superior á media”, concluíu Nava Castro.