Máis dun centenar de estudantes de 19 universidades de diferentes países de Europa, América, África e Asia percorreron o Camiño de Santiago como parte da súa formación práctica en dereitos humanos, turismo e diálogo intercultural. Foron os participantes do foro internacional universitario O valor dos dereitos humanos no Camiño de Santiago que organizou a Organización Mundial del Turismo (OMT), o Grupo Compostela de Universidades (GCU) e a ONG Helsinqui España, e que culminou con xornadas e relatorios en Santiago de Compostela.

Despois de estudar os principios e requisitos clave para o desenvolvemento do turismo sustentable, así como os principios éticos e de responsabilidade no Camiño de Santiago, os alumnos percorreron a ruta xacobea. Divididos en catro grupos e aloxándose en establecementos da Rede Pública de Albergues da Xunta de Galicia, andiveron durante esta semana unha distancia de 100 quilómetros do Camiño Francés, o Camiño Portugués, o Camiño do Norte e a Vía da Prata coa intención de promover o diálogo intercultural.