Baixo o lema Roadshow Destinazione Spagna, Turismo de Galicia participará esta semana no programa de presentacións da oferta turística galega nas cidades italianas de Roma, Florencia, Verona e Turín. Esta campaña de presentacións comezará o vindeiro luns en Roma e rematará en Turín o día 12.

Ao longo destas sesións, a oferta turística galega se presentará a máis de 230 operadores turísticos locais, tendo en conta que na capital italiana está previsto que participen 80 empresarios, 70 en Florencia, 40 en Verona e 45 en Turín. Desde xeito, o Goberno galego afonda no seu modelo de internacionalización, en liña cos obxectivos plasmados entre a administración e o sector na Estratexia do turismo de Galicia 2020.

Durante estas xornadas de promoción, Turismo de Galicia fará especial fincapé na oferta relacionada coa natureza, a cultura e a gastronomía; tendo moi en conta tamén o Camiño de Santiago, do que Italia é o país estranxeiro que máis Compostelas recibiu ao longo de 2017.

Polo que respecta á demanda turística italiana, no pasado ano obsérvase un comportamento positivo no ámbito do aloxamento regrado –inclúe establecementos hoteleiros, apartamentos turísticos, cámpings e turismo rural–. En particular, crece tanto a cifra de viaxeiros aloxados, un 1,6%, coma o volume de noites, un 9,6% neste caso, en relación ao anterior 2016.

É o sexto ano consecutivo no que melloran as cifras do mercado italiano en Galicia, o que sitúa os niveis de demanda en máximos históricos en Galicia con preto de 155.000 viaxeiros aloxados e case 240.000 noites no conxunto da oferta regrada da Comunidade.

Líder no Camiño de Santiago

Polo que respecta ao Camiño de Santiago, o pasado ano, 27.103 italianos recibiron a Compostela, o que sitúa a Italia como o país estranxeiro con más peregrinos.

Neste sentido, cabe salientar que o número de italianos no Camiño de Santiago aumentou nun 11,65% ao longo dos 12 meses de 2017 en relación ao mesmo período do ano anterior.