07 mai 2018
Axentes turísticos do operador norteamericano Exclusively Spain visitarán Galicia para coñecer a súa oferta turística
Un grupo de profesionais do turismo dos Estados Unidos percorrerá a vindeira semana parte do territorio galego para recadar información turística co obxecto de organizar despois viaxes á nosa Comunidade autónoma
EEUU está a demostrar ser un mercado emisor en alza, como demostra o incremento do 28% da súa demanda turística no primeiro trimestre deste ano e o aumento dun 15% no número de peregrinos norteamericanos o ano pasado
Estados Unidos é un mercado emisor en alza para Galicia como demostra ese incremento do 28% no número de visitantes aloxados en hoteis galegos e nas pernoitas durante o primeiro trimestre do ano, comparado co mesmo período de 2017. Ademais, o país americano tamén se revelou en 2017 coma un dos máis activos no Camiño de Santiago. Foi o cuarto que máis Compostelas rexistrou logo de España, Italia e Alemaña. Dese xeito, o ano pasado, con 17.535 peregrinos, o número de norteamericanos medrou un 15,08% en relación ao ano anterior
Ao obxecto de incentivar e incrementar a demanda de América do Norte, Turismo de Galicia organiza distintas accións de promoción tanto nos propios mercados emisores, como neste caso no destino. Así, esta semana, un grupo de axentes de viaxes adscritos ao operador turístico Exclusively Spain visitarán a Comunidade galega para coñecer parte dos seus recursos e servizos turísticos ao obxecto de recadar información para a organización futura de viaxes destinados grupos de norteamericanos interesados no destino Galicia.
Esta viaxe de familiarización coa oferta turística galega comezará o martes 8 de maio e rematará o día 14. Durante a súa estadía no territorio galego, os axentes norteamericanos terán a oportunidade de coñecer distintas contornas da costa e o interior de Galicia onde se concentran os principais recursos, produtos e servizos turísticos galegos.
Camiño de Santiago
Na xira pola Comunidade galega organizada por Turismo de Galicia, os profesionais dos Estados Unidos poderán tamén tomar contacto co Camiño de Santiago e a súa meta, a cidade de Santiago de Compostela.
Ademais, tamén terán a oportunidade de coñecer distintos servizos e tomar contacto con profesionais galegos para desenvolver paquetes turísticos
