A directora de Turismo de Galicia, Nava Castro, visitou en Folgoso do Courel os participantes dunha das actividades incluídas en Xuventur 2018, o programa de educación non formal impulsado polas consellerías de Cultura e Turismo e a de Política Social que se celebrou durante as fins de semana de outubro combinando o lecer saudable con estadías de fin de semana no rural.

Coa súa presenza, Nava Castro puxo en valor a importancia de sensibilizar á mocidade galega das numerosas oportunidades que as contornas rurais ofrecen no eido turístico, como un elemento clave para o seu desenvolvemento social, cultural e económico. En Folgoso do Courel, os participantes puideron formar parte de diferentes actividades de inmersión no medio natural a través da creatividade. Incluíronse obradoiros con intervencións multidisciplinares no eido da creación audiovisual, performance, artes escénicas, danza ou creación literaria, entre outras.

A edición deste ano –que contou coa participación de máis de 500 mozos- permitiu que a xuventude galega coñecese a riqueza natural, cultural e patrimonial das catro provincias. Tomando como fío condutor os recursos naturais –o primeiro motivo polo que os turistas elixen Galicia– creáronse oito programas para fomentar o seu coñecemento, o coidado e contacto co medio e o goce da paisaxe.

Incluíronse destinos como o Parque Natural das Fragas do Eume, Ferrolterra ou a Costa da Morte, na provincia da Coruña; a Mariña Lucense, o Courel e os Ancares, na de Lugo; o Baixo Miño en Pontevedra ou o Parque Natural do Xurés, en Ourense. Iniciativas como esta alíñanse coas propostas nas que está a traballar o Goberno galego, co deseño do Plan Estratéxico de Turismo Rural e o Plan Enogastronómico, dous documentos cos que seguir mellorando en eidos nos que Galicia está chamada a ser un referente.