Nace coa finalidade establecer as medidas precisas para dar resposta aos retos que afronta a ruta xacobea no horizonte dos próximos cinco anos co obxectivo de darlle resposta a estes retos a través de distintas propostas de actuación que se levarán a cabo no Camiño, no marco dunha aposta pola preservación do seus valores e pola busca da excelencia, sempre baixo criterios de sustentabilidade, accesibilidade e universalidade que definen o propio fenómeno da peregrinación a Santiago de Compostela. Traza os obxectivos de traballo cara á celebración do vindeiro Ano Santo, en 2027, fixando as liñas estratéxicas co obxectivo de preparar Galicia para o seguinte Ano Santo.

 

Este Plan amplía os obxectivos do Plan Director 2015-2021, englobando 7 retos globais artellados arredor de 17 liñas de actuación e 98 accións dirixidas a protexer e preservar o Camiño de Santiago. Os retos a abordar son o valor patrimonial dos Camiños: dixitalización e sustentabilidade; os camiños: promoción de itinerarios e variantes e a súa conexión internacional; a experiencia de usuario/a do peregrino/a e novas fórmulas innovadoras; a mellora da gobernanza; a mellora nos servizos dos Camiños de Santiago: igualdade, inclusión e diversidade; a aposta polos produtos locais e implicación da veciñanza; e a potenciación de todos os roteiros de peregrinación recoñecidos.

 

Galicia ten no Camiño de Santiago un elemento estratéxico para o seu posicionamento como destino turístico, xa que o Camiño non só fixa a imaxe máis recoñecible fóra de Galicia senón que tamén funciona como dinamizador socioeconómico dos territorios polos que pasa e xerador dun amplo catálogo de produtos turísticos diferentes e únicos cos que estamos construíndo a nosa oferta. Por iso, dende a Xunta a premisa é seguir garantindo o seu coidado como fenómeno de peregrinación en todo o que atinxe ás súas infraestruturas do trazado e da acollida.