O director de Área de Sociedade Dixital lembrou que unha das iniciativas da Estratexia Galicia Dixital 2030 é a configuración dun territorio intelixente, que facilitará a toma de decisión e a xestión, tanto dos servizos públicos como doutros ámbitos como o cultural e o turístico. Miguel Rodríguez sinalou que a pedra angular desta iniciativa, a Rede ICousas, xa está en funcionamento e que ten capacidade para instalar ata 300.000 sensores no territorio, o que permitirá captar grandes cantidades de datos.

 

O director de Turismo destacou a recente licitación do Observatorio de Sostibilidade, baseado na análise de datos, e lembrou que o turismo é un dos sectores que máis participa no desenvolvemento tecnolóxico. Tamén salientou a importancia que a dixitalización terá na futura Estratexia de Turismo de Galicia 2024-2030 na que a Xunta está traballando.

 

Pola súa banda, o director-xerente da Fundación Deporte Galego puxo en valor o uso de aplicacións para a xestión ordinaria das relacións do ámbito deportivo coa administración e anunciou a creación dunha plataforma para acoller o censo de instalacións deportivas con utilidades como a xeolocalización.

 

Tras a inauguración, o CEO de Neuromobile, Raúl Serapio, recoñecido como un dos 100 directivos máis creativos pola revista Forbes en 2022, foi encargado da conferencia inicial. O resto da xornada, que se prolongará ata as 14.00, estrutúrase en tres mesas redondas, unha por sector, e completarase cunha demostración de olería orixinal.