O director de Turismo de Galicia, Xosé Merelles, participou na presentación do primeiro equipo feminino do Club de Balonmán do Porriño-Club Conservas Orbe Zendal BM Porriño onde salientou a “aposta estratéxica” da Xunta por apoiar o deporte “tendo en conta a importante repercusión para a imaxe de Galicia nas competicións profesionais”.

Neste sentido, felicitou ao equipo pola súa traxectoria e por conseguir ter presenza, por primeira vez na historia do clube, na competición europea “un paso máis para o clube e tamén para a promoción de Galicia a través do deporte en contextos internacionais”, expresou. Xosé Merelles recordou que o turismo deportivo é “un dos segmentos turísticos que medra máis rápido con cada vez máis persoas que visitan os destinos motivados pola práctica do deporte ou para asistir a eventos deportivos”.

“Nestes momentos de auxe mundial do turismo, desde Galicia imos seguir traballando por diversificar e segmentar a oferta e o deporte vai ser o gran aliado”, engadiu o director de Turismo.