Magnífico palacio que construíu nos comezos do seiscentos un dos maiores fabuladores locais, don Pedro Fernández de Boán y Landecho, gastando os cartos logrados polo seu tío don Juan, que fora cargo importante na Audiencia de Lima e incluso, temporalmente, vicerrei, e promotor do que hoxe se coñece como o Pazo de San Damián en Amoeiro. Ten catro escudos na parte superior do segundo piso, baixo o balcón corrido, onde campan as armas dos Boán e os Landecho.