Turgalicia promocionou o Turismo de Galicia en Arxentina a través da Feira Internacional do Turismo de América Latina
O turismo galego estivo presente neste evento cun módulo no que se difundiron os principais valores turísticos galegos
Galicia tamén participou na feira turística xaponesa JATA
Turismo de Galicia, promocionou o destino turístico Galicia en Arxentina, un dos mercados emisores exteriores con máis potencial para a comunidade galega.
Deste xeito, técnicos de Turismo de Galicia participaron en Bos Aires na Feira Internacional do Turismo de América Latina (FIT), onde se instalou un módulo dentro do stand de promoción turística de España.
Arxentina considérase nestes momentos un dos mercados emisores estranxeiros con máis potencial de crecemento para Galicia, debido fundamentalmente ao turismo de raíces.
Presenza en Xapón
Por outra parte, Turismo de Galicia estivo tamén na feira de turismo de Xapón, JATA Travel Showcase 2013.
Galicia participou tamén nesta feira cun módulo dentro do stand de Turespaña, coordinado pola Oficina de Turismo de España en Xapón.
A presenza de Galicia neste certame turístico en edicións anteriores reafirma a necesidade de continuar reforzando a presenza galega en Xapón, debido ao interese que esperta a comunidade galega neste país, sobre todo no relacionado co Camiño de Santiago, o turismo cultural, a gastronomía e a natureza, nomeadamente tras a visita a Galicia do príncipe Naruhito e o feito de que o Camiño de Santiago e o Camiño Kumano Kodo estean irmandados.
