A cifra de viaxeiros aloxados nos establecementos extrahoteleiros galegos medrou en novembro un 8,3% con respecto ao mesmo período do ano pasado
No conxunto da oferta regrada -hoteis, pensións, casas de turismo rural, apartamentos turísticos e cámpings- as cifras medraron un 3,4% en viaxeiros e un 2% en pernoitas no mes de novembro.
No que vai de ano, os viaxeiros aloxados en establecementos regrados galegos medraron un 4,5% e as pernoitas un 1,3% en comparación co período que vai entre xaneiro e novembro do ano pasado.
Ata o día de hoxe, recolleron a Compostela 23.415 peregrinos máis que no mesmo período de 2012, isto é, un 12,17% máis. O 50,96% deles son estranxeiros e o 70,3% dos peregrinos escolleron o Camiño Francés.
Os establecementos extrahoteleiros galegos rexistraron no mes de novembro de 2013 un 8,3% máis de viaxeiros que os contabilizados no mesmo mes do ano pasado; de igual modo, a cifra de pernoitas rexistrou unha suba do 5,7% con respecto ao mesmo período de 2012. Así, as casas de turismo rural de Galicia rexistraron en novembro un 12,9% máis de viaxeiros e un 13,2% mais de pernoitas.
De igual modo, o cómputo global dos establecementos regrados, que inclúe tamén apartamentos turísticos, cámpings, hoteis e pensións, rexistraron un incremento na cifra de viaxeiros aloxados do 3,4% en conxunto e un aumento nas pernoitas rexistradas en novembro do 2% a respecto do mesmo mes do ano pasado. O turismo nacional rexistrou no mes de novembro un incremento do 3,1% con respecto ao mesmo mes do ano pasado.
Doutra parte, se se teñen en conta os datos rexistrados entre xaneiro e novembro deste ano, a cifra de viaxeiros aloxados en establecementos regrados de Galicia medrou un 4,5% e a de pernoitas neste tipo de aloxamentos subiu un 1,3%. Entre xaneiro e novembro, Galicia rexistrou un total de 3.616.009 viaxeiros que efectuaron 7.719.237 pernoitas en establecementos regrados, isto é, en hoteis, pensións, casas de turismo rural, apartamentos turísticos e cámpings.
No acumulado do ano, o incremento da demanda prodúcese basicamente por unha mellora importante do turismo internacional, que acumula un crecemento do 10,7% no que se refire á cifra de viaxeiros e do 7% no que atinxe ás pernoitas. O mercado internacional cada cotas do 24,7% do total de viaxeiros rexistrados e do 20,3% das pernoitas contabilizadas entre xaneiro e novembro deste ano. Así, este segmento ten acadado máximos históricos con case 900 mil viaxeiros aloxados e con preto de 1,6 millóns de pernoitas.
Peregrinos a Santiago
No que vai de ano, a cifra de peregrinos que recolleron a Compostela na Rúa do Vilar medrou un 12,17% con respecto aos rexistrados no mesmo período do ano pasado. En total, 215.692 peregrinos, o 50,96% deles estranxeiros, percorreron algunha das Rutas Xacobeas, isto é, 23.415 máis que o ano pasado. O 70,3% deles fixeron o Camiño Francés, a ruta máis percorrida. Tras ela, o Camiño Portugués, que rexistrou preto de 30 mil peregrinos no que vai de ano, o 13,6%.
