Segundo os últimos datos de Frontur, publicados hoxe, que analizan os movementos en fronteira, contabilizáronse nos dez primeiros meses deste ano un total de 920.000 turistas estranxeiros, o que supón un incremento do 20,3% a respecto do mesmo período de 2013. Por vez primeira nos últimos anos supérase a cifra dos 900.000 turistas neste período, supoñendo neste caso un máximo histórico na nosa comunidade.

A nivel estatal obsérvase tamén un incremento importante da cifra de turistas estranxeiros -sobe nun 7,5%- acadando algo máis de 58 millóns nestes dez primeiros meses de 2014. Galicia recibiu neste período 1,6% do total de turistas internacionais de España.

Os dous principais mercados internacionais en Galicia no que vai de ano son Portugal, co 46% dos turistas estranxeiros, e Francia, co 15%. Reino Unido sitúase en terceiro lugar co 8% do total.

En termos dinámicos obsérvase un crecemento xeneralizado do volume de turistas procedentes dos principais mercados. No caso de Portugal o incremento sitúase no 25% e de Francia no 34%.

Máis de 107.000 turistas estranxeiros en outubro
No pasado mes de outubro rexistráronse máis de 107.000 turistas estranxeiros con destino principal Galicia, cifra que supón un incremento do 13,4% en relación ao mesmo período do pasado ano. Trátase tamén dun máximo histórico, ao superar por vez primeira neste décimo mes do ano a cifra dos 100 mil turistas.

A nivel estatal produciuse tamén un incremento importante da cifra de turistas estranxeiros –subiu nun 7,8% - acadando preto de 6 millóns neste mes de outubro. Galicia recibiu neste mes o 1,8% do total de turistas internacionais de España.

Tamén no mes de outubro Portugal, co 49% dos turistas estranxeiros, e Francia, co 12%, son os dous principais mercados internacionais en Galicia. Ambos, xunto con Reino Unido, presentaron un comportamento positivo neste décimo mes do ano, con incrementos superiores ao 10% interanual.