Un membro da Asociación de amigos do Camiño de Santiago American Pilgrims será o primeiro hospitaleiro voluntario que prestará servizo durante a primeira quincena do mes de maio no albergue público de Ribadiso, no Camiño Francés, dentro do programa de hospitaleiros voluntarios posto en marcha de forma experimental por Turismo de Galicia para mellorar a calidade da acollida aos peregrinos nos albergues da Xunta.

Grazas ao acordo establecido entre Turismo de Galicia e American Pilgrims os hospitaleiros voluntarios estarán presentes neste emblemático albergue do Camiño francés entre o 1 de maio e o 15 de outubro e contarase coa participación de 17 hospitaleiros norteamericanos.

O hospitaleiro colaborará na acollida aos peregrinos compartindo con eles a súa experiencia no Camiño de Santiago. Deste xeito, compartirá estancia cos albergueiros de Ribadiso fomentando a mellora da atención aos peregrinos que pernoitan neste albergue do concello de Arzúa.

En datas vindeiras outros albergues, en colaboración con outras asociacións de amigos do Camiño de Santiago, iniciarán tamén este programa pioneiro de hospitalidade nos albergues de peregrinos da Rede pública de Galicia.

O obxectivo é facer máis doada a acollida aos peregrinos na rede de albergues públicos de Galicia, conformada por 70 establecementos con mais de 3.000 prazas de aloxamento.

Estes voluntarios non realizarán funcións de mantemento do albergue senón especialmente de acollida, compartindo a súa experiencia e participan nas inquietudes dos demais peregrinos.

O programa de hospitaleiros voluntarios en Ribadiso continuará coa presenza de membros da American Pilgrims ata o 15 de outubro.

Curso de formación para hospitaleiros
Dentro deste programa piloto, Turismo de Galicia organizou un curso previo de formación para hospitaleiros e axentes de acollida co obxectivo de dar resposta a unha petición de diversas asociacións de Amigos do Camiño de Santiago, especialmente de carácter internacional, que solicitaban a posta en marcha dun programa de estadías de hospitaleiros voluntarios nos albergues da Rede Pública de Albergues da Xunta de Galicia.