Turismo de Galicia organizou a pasda fin de semana unha presentación da oferta turística da Comunidade galega na cidade portuguesa de Viseu, dentro dun programa de difusión do turismo español deseñado pola Oficina de Turismo de España en Lisboa.

Deste xeito, o departamento de Turismo da Xunta estivo presente cun recinto de promoción turística no centro comercial Palácio do Gelo de Viseu, desde onde difundiu os recursos e os servizos turísticos galegos. Ademais de presentar a oferta galega, Turismo de Galicia organizou degustacións gastronómicas e outras promocións para fomentar o interese do público portugués polo destino Galicia.

Esta actividade xa tivo lugar no centro comercial Nova Arcada de Braga a fin de semana pasada e está previsto que se leve a cabo tamén no espazo Alma Shiopping os días 28 e 29 de outubro.

Demanda portuguesa

No ámbito hoteleiro, o mercado portugués no mes de agosto rexistrou un incremento tanto da cifra de viaxeiros aloxados –do 11,2%- como das pernoitas –do 20,2% neste caso-, sendo un dos mercados máis dinámicos na nosa Comunidade.

Con máis de 35.000 viaxeiros e de 74.000 noites, liderou o turismo internacional neste oitavo mes do ano e representa o 24% do total internacional. No conxunto dos primeiros oito meses do ano, o turismo portugués está a marcar un comportamento positivo superando nun 12% a cifra de viaxeiros aloxados e nun 17% o volume de pernoitas do mesmo período do pasado ano. En termos de volume, o mercado portugués tradúcese en máis de 143.000 viaxeiros aloxados e de 247.000 pernoitas.