A directora de Turismo de Galicia, Nava Castro, asinou un memorando de entendemento con Joon Ho Ahn, director xeral da División de Turismo e Deporte do Goberno metropolitano de Seúl. Con este documento, a Xunta e esta rexión de Corea do Sur recoñecen a importancia do turismo relixioso así como do desenvolvemento da peregrinación no contexto dunha axenda internacional común.

A través deste memorando, asinado no marco do Foro Internacional Universitario O valor dos dereitos humanos no Camiño de Santiago, ambos gobernos comprométense a cooperar en temas de interese compartido. Así, Galicia e Seúl buscarán o mutuo beneficio, facendo esforzos conxuntos no eido da promoción e difusión do turismo relixioso e a peregrinación.

“Este memorando de entendemento expresa a nosa amizade e o noso desexo de continuar afondando nesta relación á que tanta importancia concedemos desde a Xunta”, sinala a directora de Turismo a propósito desta sinatura. Amais, manifesta un “recíproco interese por seguir achegando dous territorios moi afastados no espazo, pero próximos neste eido”.

Con este memorando de entendemento, a Comunidade galega dá continuidade a proxectos de colaboración con este país asiático, especialmente prolíficos nos últimos anos. De feito, incrementouse dun modo destacado o número de cidadáns procedentes de Corea do Sur que percorren o Camiño de Santiago. En 2017 foi a décima nacionalidade máis presente na ruta xacobea e, no que vai de ano, é a terceira, só por detrás de españois e alemáns.

Proxectos co país asiático

Este memorando súmase a outros proxectos en materia turística que vinculan a Galicia con Corea do Sur, como a visita o pasado outono de representantes dos itinerarios de Jeju Olle, que percorren a illa volcánica de Jeju. Amais, este ano a Comunidade galega acollerá a celebración do World Trails Congress, un encontro que foi creado precisamente en Corea do Sur en 2010. A súa celebración no mes de setembro servirá para seguir conectando rutas de todo o mundo e promover a súa mellora e protección a través dunha colaboración global.