A Xunta enxalza en Fitur a calidade das materias primas galegas a través das festas gastronómicas como reclamo turístico
A directora de Turismo de Galicia, Nava Castro, xunto ao delegado territorial da Xunta en Pontevedra, Luis López, participou na segunda xornada da Feira Internacional de Turismo para abordar o sector turístico de Galicia a través das festas enogastronómicas do territorio
directora de Turismo de Galicia, Nava Castro, acompañada do delegado territoral de Pontevedra, Luis López, participou en Fitur en Madrid, para abordar o sector turístico de Galicia a través das festas enogastronómicas máis destacadas do territorio, a Festa do Albariño de Cambados, a Feira do Cocido de Lalín, a Festa do Pulpo do Carballiño e a Festa de Lamprea Arbo.
A través destes catro baluartes da gastronomía, Galicia aproveita para difundir e promocionar aspectos sobre a cultura do viño e a súa produción, as materias primas, o produtos autóctonos e o seu patrimonio gastronómico como atractivo dentro e fóra do territorio. Ademais, segundo sinalou López, “en Galicia temos 13 festas enogastonómicas recoñecidas a nivel internacional”.
Nesta mesma liña, Nava Castro sinalou que a estas 13 súmanse “as 11 festas declaradas de interese turístico nacional e ás 132 festas de interese turístico en Galicia”. Así, durante a súa intervención puxo en valor a Festa da Lamprea de Arbo, a Festa do Marisco do Grove e a Festa do Bonito de Burela, como referentes da exaltación dos produtos do mar e representantes das celebracións de alcance nacional.
A través destes eventos ponse a atención en Galicia como unha terra cunha ampla variedade de materias primas de gran calidade, neste caso, procedentes do mar e impulsoras da economía das zonas onde se producen. Nesta liña, Galicia conta cunha “proxección de cara ao exterior clave, o que repercute, por suposto, en sectores como o turismo” apuntou a titular de Turismo.