O director de Turismo de Galicia, Xosé Merelles, valorou no Iberik Balneario de Guitiriz o éxito alcanzado polo bono turístico nesta nova edición que logrou implicar 426 establecementos na estratexia de desestacionalización do destino impulsada pola Xunta de Galicia.

Xosé Merelles puxo de manifesto que o programa prevé mobilizar este ano 2,5M€ que irán directamente ao sector turístico galego. Ademais, salientou que o número de descargas dos bonos foi de 16.666 e tras iniciarse o 10 de setembro, os beneficiarios teñen ata o 25 de decembro para gastalo. Este ano a novidade foi a posibilidade de cada usuario de descargar ata dous bonos que tiñan un importe de 150 euros cada un.

Tras a visita ás instalacións do establecemento, Xosé Merelles subliñou que na totalidade das catro edicións anteriores, o bono turístico con máis de 47.000 emitidos, mobilizou un total de 14M€ que foron directamente ao sector, primeiro para paliar a baixada de rendibilidade provocada polo COVID, para logo “sumalo nun dos eixos da Estratexia de Turismo 2030 como é a desestacionalización”.

Datos turísticos

O director de Turismo de Galicia subliñou ademais o crecemento en número de viaxeiros alcanzado este ano en setembro, primeiro mes de desenvolvemento da campaña, que experimentou un incremento do 2,8%, unha tendencia que continuou tamén no mes de outubro cun incremento de viaxeiros do 5,6% con respecto ao mesmo mes do pasado ano.

Ademais, referiuse aos últimos datos feitos públicos hoxe mesmo relativos ao aloxamento en hoteis durante o pasado mes de novembro que falan de incrementos en número de viaxeiros do 10,8% e en noites do 11,2%.