Galicia puxo fin ás xornadas de presentación de destino de Fitur 2025 dirixidas ao sector profesional do ámbito turístico con dúas propostas que permiten afianzar a estratexia de desestacionalización. O xerente de Turismo de Galicia, Antonio Casas foi o encargado de promover o turismo termal e o director de Turismo, Xosé Merelles, presentou o produto ‘Trens Turísticos’, promovido con Renfe e o Instituto Ourensán de Desenvolvemento Económico (Inorde).

Durante a presentación de ‘Termalismo en Galicia, Auga para os sentidos’, Anotonio Casas salientou que Galicia é o segundo lugar de Europa con maiores reservas de augas mineromedicinais, o que deu lugar a que a comunidade conte con máis de 20 balnearios, o que supón o 20% da oferta termal de toda España.

Neste sentido, presentou unha guía que recolle a oferta de hoteis balneario, talasos e balnearios sen aloxamento. En total, 24 establecementos localizados na provincia da Coruña (2 balnearios); Lugo (4 balnearios e 1 talaso); Ourense (6 balnearios) e Pontevedra (8 balnearios e 3 talasos). Ademais, nunha aposta pola dixitalización do destino, a APP Galicia Termal inclúe esta oferta xunto con outra información de utilidade para o visitante.

Trens turísticos

Finalmente, o director de Turismo de Galicia presentou o produto turístico ‘Trens Turísticos’, un programa que aposta pola mobilidade segura, a sostibilidade e a calidade. O visitante, ademais de percorrer a Comunidade, pode gozar de propostas do destino galego como a cultura da camelia, os faros da costa galega, a viticultura, a gastronomía ou o rico patrimonio natural e arquitectónico de Galicia. O programa arranca este ano cun total de 2.530 prazas repartidas en 33 saídas, que se desenvolverán entre marzo e outubro.

Tanto a oferta de turismo termal coma os Trens Turísticos son dúas propostas coas que a Axencia de Turismo de Galicia quere seguir afondando na súa estratexia de desestacionalización do destino.

Galicia continúa amosando a súa oferta turística en Fitur pero será xa cunha programación dirixida a público en xeral na que non faltan obradoiros artesáns, degustacións gastronómicas e actuacións musicais, entre outras.