O director de Turismo de Galicia, Xosé Merelles, inaugurou a mostra ‘Camelia, Flor de Galicia’, organizada pola Xunta de Galicia, e fíxoo convidando a visitar esta exposición que “pola súa dimensión, variedade e atractivo está chamada a converter Santiago de Compostela en destino imprescindible esta Semana Santa”. Instalada no Pazo de Fonseca, aos pés da Catedral de Santiago, Xosé Merelles salientou a idoneidade do espazo elixido así como a riqueza visual e sensorial desta exposición que inclúe máis de 200 variedades desta flor, “xa identitaria da oferta turística de Galicia”.

O director de Turismo de Galicia subliñou como a mostra serve para enriquecer o atractivo turístico da cidade vinculado á Semana Santa de Santiago, recoñecida como Festa de Interese Turístico de Galicia desde 2018. Faino, ademais, a través dun dos recursos singulares da comunidade, a flor da camelia, que chegou a Galicia a finais do século XVIII e expandiuse por toda a xeografía, ata o punto de que a comunidade é hoxe en día referente internacional no seu cultivo. “Deste xeito -destacou- ponse en valor o atractivo turístico da terra, a través do seu patrimonio paisaxístico, natural e artístico”.

Neste sentido, a mostra propón unha combinación de cultura botánica e tradición, ao mesturar máis de 200 variedades de camelias con elementos decorativos do traxe galego en espazos con valor arquitectónico, como é o claustro do Pazo de Fonseca. Participan 25 coleccionistas de camelias, tanto particulares como asociacións, entre elas a Asociación Galega da Camelia, a Estación Fitopatolóxica de Areeiro ou o Pazo Quinteiro da Cruz. Ademais, como novidade, utilizaranse creacións audiovisuais para enriquecer a proposta expositiva.

As persoas que visiten a mostra poderán afondar na oferta de produtos turísticos xerados en torno á camelia. Xosé Merelles aludiu, entre outros, á Ruta da Camelia en flor, un produto turístico único en España que aproveita o potencial de Galicia como destino de referencia no turismo de xardíns. Creado en 2005, na actualidade inclúe 19 lugares singulares -15 xardíns  e catro recursos turísticos asociados- das provincias de Pontevedra e A Coruña.

Nesta liña, o director de Turismo de Galicia referiuse tamén ao Tren Turístico da Ruta da Camelia en Flor, un dos itinerarios incluídos nos Trens Turísticos de Galicia que a Axencia puxo en marcha con Renfe e o INORDE. Este itinerario ven de realizar en marzo as súas dúas saídas con todos os billetes esgotados.

A exposición ‘Camelia, flor de Galicia’ está organizada por Turismo de Galicia en colaboración coa Sociedade Española da Camelia e a Universidade de Santiago de Compostela. 

Turismo de Galicia aposta así por diversificar e complementara oferta turística de Santiago de Compostela, asegurando unha proposta atractiva e de calidade para quen visita a comunidade nestas datas.