Tres representantes do operador turístico británico Frontier Holidays visitarán Galicia entre hoxe e o día 9 de xuño ao obxecto de recadar información turística nas provincias da Coruña e Pontevedra para programar viaxes para os seus clientes nos camiños de Santiago Portugués e Fisterra-Muxía.

O obxectivo da visita é elaborar entre sete e dez paquetes nas Rías Baixas e a Costa da Morte, tendo como motivo principal o sendeirismo, a gastronomía e a cultura.

Neste caso, un representante de Frontier Holidays dedicarase a analizar o sendeirismo e as rutas do Camiño de Santiago, outro visitará as adegas, restaurantes e oferta complementaria e un terceiro visitará os hoteis.

Por outra parte, este operador turístico xa programou o Camiño do Sueste nos seus catálogos para turistas británicos, e este paquete foi mencionado polo prestixioso suplemento da prensa británica The Sunday Times como un dos 25 novos destinos orixinais de vacacións en España.

Esta viaxe conta con apoio tanto loxístico como informativo de Turismo de Galicia.