O director de Turismo de Galicia, Xosé Merelles, acompañado pola delegada territorial da Xunta de Galicia en Ferrol, Martina Aneiros, realizou unha vista ás actuacións realizadas no Concello de Ares no marco das axudas de Turismo de Galicia de embelecemento do litoral. Concretamente, Turismo de Galicia investiu o pasado ano 2,7M€ no financiamento de distintas actuacións en materia de sostibilidade, dixitalización e accesibilidade dos destinos turísticos en municipios do litoral da comunidade galega. Foron en total 64 actuacións repartidas en 23 concellos na liña de sostibilidade, 22 na de dixitalización e 10 na de accesiblidade.

En concreto, as actuacións realizadas no Concello de Ares consistiron na mellora do camiño da Bailadora, na dixitalización de rutas de sendeirismo e na mellora da accesilidade no parque de Rosalía. O custe total das mesmas ascendeu a máis de 147.000 euros dos que Turismo de Galicia financiou o 90%. 

Xosé Merelles destacou ademais que estas actuacións teñen como obxectivo embelecer os recursos patrimoniais e naturais destes municipios ao tempo que incrementan o seu potencial turístico. 

Precisamente, o director de Turismo de Galicia destacou que en 2024, o xeodestino de Ferrolterra recibiu a visita de 164.904 turistas, un 4,5% máis que o ano anterior, con especial incidencia nos meses de febreiro, marzo e maio e no último trimestre do ano, “o que confirma o carácter desestacionalizador deste destino turístico” que se enmarca como eixo na Estratexia de Turismo de Galicia 2030. 

Transición verde, dixital e accesible

Durante a visita, na que estivo acompañado polo alcalde de Ares, Julio Iglesias Redondo, o director de Turismo de Galicia salientou a importancia axudas que permiten que os municipios costeiros da Comunidade poidan ter recursos para avanzar “na transición verde e ecolóxica e tamén na dixital, accesible e inclusiva”. 

Esta liña de subvencións permite a rehabilitación do patrimonio en espazos singulares, de edificios como museos e monumentos, investimentos en zonas verdes e sendeiros e en aplicacións dixitais, edición de folletos e guías turísticas virtuais, sinalización monumental intelixente e actuacións para mellorar a accesilidade e a inclusividade, entre outras. 

A convocatoria estivo cofinanciada pola Unión Europea a través dos Fondos do Mecanismo de Recuperación e Resiliencia Next Generation.