A igrexa de San Cibrán de Aldán é un edificio neoclásico datado en 1866, erguido no mesmo lugar que ocupou un templo anterior do século XVI. Ten planta lonxitudinal e os muros son de sillares de granito. A súa fachada, con elementos arquitectónicos propios dese estilo como pilastras con capiteis clásicos adosadas e un friso baixo a cornixa con tríglifos e métopas, aparece presidida pola imaxe do patrón da parroquia, San Cibrán coas vestiduras e atributos de bispo, situada nunha hormacina e baixo un reloxo. Tamén destaca a gran torre de dous corpos con balaustradas que alberga o campanil.