A oferta turística galega achégase a Polonia a través das xornadas de promoción de Lublin
Turismo de Galicia participou neste acontecemento, o máis importante no eido turístico da rexión
A pasada fin de semana a promoción da oferta turística galega centrouse en Polonia, onde Turismo de Galicia participou nas xornadas de promoción de Lublin. Trátase do acontecemento turístico para o público final máis importante da rexión, que acolle a milleiros de participantes na súa capital.
Así, o departamento de promoción turística da Xunta instalou un recinto de promoción a través do que se divulgaron os valores turísticos galegos, así como distintos aspectos culturais do territorio de Galicia.
Demanda turística
Polo que respecta á demanda turística, durante o primeiro cuadrimestre do ano 2017, Polonia mostrou un comportamento positivo. Así, superou os niveis de demanda do mesmo período do pasado ano nun 12%, tanto a cifra de viaxeiros aloxados coma no volume de pernoitas.
Con preto de 3.000 viaxeiros e case 3.600 noites nos establecementos hoteleiros da comunidade o mercado polaco representa o 2,2% do total internacional
Máis de 850 peregrinos polacos
No que se refire ao Camiño de Santiago, o mercado polaco está a demostrar ser tamén un dos mercados en auxe. De feito, no que vai de ano realizaron algún dos itinerarios xacobeos un total de 854 peregrinos, mentres que o ano pasado por estas datas o fixeran 659, o que supón un incremento do 29%.