Un grupo de representantes dos principais operadores turísticos especializados en turismo de saúde de Noruega visitaron recentemente a Comunidade galega co obxecto de coñecer a súa oferta termal no ámbito dunha viaxe organizada por Turismo de Galicia en colaboración coa Asociación Balnearios de Galicia.

Os participantes nesta viaxe representaban ás compañías Vin & Matglede, Eurotravel, Sør Vest Reiser e Senior Travel. Ademais, acompáñaos nesta viaxe un xornalista do xornal Østfoldavisen.

Os operadores turísticos noruegueses fixeron unha visita a Tui, vila histórica cuxo casco antigo foi declarado conxunto histórico- artístico no ano 1951. E coñeceron o balneario de Cuntis, así como o hotel Termas de Cuntis.

Visita a Lugo
Os axentes turísticos de Noruega fixeron un tour pola cidade de Lugo, con visitas á Catedral de Santa María, á praza Maior, á Domus de Mitreo e á Muralla Romana, declarada Patrimonio da Humanidade pola UNESCO no ano 2000.

Logo deste percorrido pola cidade, os visitantes achegáronsee ata o Balneario de Lugo, onde puideron coñecer as súas instalacións así como as termas romanas situadas no complexo termal.

Ribeira Sacra
Os operadores turísticos convidados por Turismo de Galicia para coñecer a oferta termal de Galicia visitaron a Ribeira Sacra, destino turístico que aspira a converterse en Ben Patrimonio da Humanidade e que alberga a meirande concentración de cenobios e mosteiros de Galicia.

Nesta contorna, estiveron nunha adega da Denominación de Orixe Protexida Ribeira Sacra, o miradoiro dos Balcóns de Madrid, así como os mosteiros de Santo Estevo de Ribas de Sil e San Pedro de Rocas. Tamén se achegaron ata o complexo Laias Caldaria Hotel Balneario para visitar as súas instalacións e gozar dos seus tratamentos termais.

As Rías Baixas e Santiago de Compostela
Na súa estadía en Galicia, os operadores turísticos noruegueses acehgáronse tamén ata as Rías Baixas para visitar a vila de Sanxenxo, a praia da Lanzada e Cambados, ademais de embarcarse nun pequeno cruceiro pola Ría de Arousa.

Os visitantes de Noruega trasladáronse á cidade de Santiago de Compostela para visitar a Catedral e as súas cubertas. Logo, achegáronse ata o Hotel Balneario de Compostela, en Brión, para coñecer as súas instalacións e recursos termais.

A estadía dos operadores turísticos noruegueses rematou onte, día 21 de setembro, cando partiron cara os seus lugares de orixe.

Mercado noruegués
O mercado noruegués experimentou, nos primeiros sete meses deste ano 2015, un importante incremento dos seus niveis de demanda no segmento hoteleiro de Galicia, superando nun 15,9% a cifra de viaxeiros aloxados e nun 11% o nivel de pernoitas do mesmo período do pasado ano.