A cidade británica de Southampton acolle a oferta de turismo náutico da Comunidade galega dentro da feira Southampton Boat Show, un dos salóns náuticos máis importantes de Gran Bretaña.

Turismo de Galicia participa por primeira vez neste certame turístico que pechará as súas portas o vindeiro 24 de setembro.

Nesta ocasión, o departamento de Turismo da Xunta comparte un recinto expositivo coa entidade Portos de Galicia co obxectivo de promover as potencialidades náuticas de Galicia, as instalacións e os distintos produtos turísticos relacionados con esta modalidade turística.

Dentro do calendario anual de feiras, ademais da Southampton Boat Show, o turismo náutico da Comunidade tamén se promoverá ao longo deste mes de setembro no Grand Pavois de La Rochelle, e, en decembro, no Salón Núatico de París, ambos en Francia.

Coa presenza nesta feira, Turismo de Galicia reforza o seu compromiso co turismo náutico, de enorme potencialidade e que ocupa un lugar destacado na Estratexia do turismo de Galicia 2020, a folla de ruta do turismo galego para os vindeiros anos que pretende acompañar o crecemento responsable do turismo na nosa comunidade.

Demanda turística

Polo que respecta á demanda turística do mercado británico nos primeiros sete meses deste ano, este mostra un comportamento positivo superando nun 18% a cifra de viaxeiros aloxados e nun 14% o volume de pernoitas do mesmo período de 2016.

Así, con algo máis de 40 mil viaxeiros aloxados e preto de 77 mil noites, Gran Bretaña sitúase en quinto lugar en orde de importancia cunha cuota de mercado do 7% sobre o total internacional nos sete primeiros meses de 2017.

Por outra parte, no pasado mes de xullo a demanda turística británica medrou nun 13% canto á cifra de viaxeiros aloxados e nun 12% o volume de pernoitas do pasado ano.