16 abr 2018

A Xunta presentou en Austria a oferta para a práctica da bicicleta de montaña BTT Galicia

 Turismo de Galicia participou no Argus Bike Festival en Viena, un dos eventos máis importantes organizado arredor do mundo da bicicleta en Centroeuropa

 
Arredor de 12.000 austríacos visitaron a Comunidade galega ao longo do pasado ano e realizaron 17.000 pernoitas nos seus establecementos hoteleiros
Turismo de Galicia levou a Viena a oferta galega de BTT.

 A oferta para a práctica da bicicleta de montaña BTT Galicia promoveuse na capital de Austria, Viena, dentro dun dos acontecementos máis destacados dos que se organizan arredor do mundo da bicicleta en Centroeuropa. Trátase do Argus Bike Festival, que se desenvolveu a pasada fin de semana na Praza do Concello de Viena e que acolleu as principais novidades europeas canto ao cicloturismo.

Deste xeito, o departamento de Turismo da Xunta de Galicia tivo a oportunidade de divulgar e expoñer a oferta relacionada cos catro centros BTT cos que conta a Comunidade galega na actualidade: O Salnés, Portas de Galicia, Ribeira Sacra e Serra do Xurés.

Ademais, Turismo de Galicia presentou as posibilidades que ofrece o territorio galego para o cicloturismo así como a súa oferta turística xeral, a través dos seus principais recursos.

Por outra parte, polo que respecta á demanda turística,o pasado ano, 12.000 austríacos visitaron Galicia e realizaron 17.000 pernoitas nos establecementos hoteleiros galegos.

Centros BTT Galicia

Centros BTT Galicia é un proxecto que pretende dotar a Galicia dunha rede de espazos para a práctica con bicicletas todo terreo (BTT). Un Centro BTT é un espazo ao aire libre, deseñado e preparado para usuarios da bicicleta de montaña, que posibilita o coñecemento do medio rural e natural a través da desta práctica deportiva. Así, os usuarios poden atopar todo tipo de servizos e rutas para esta práctica deportiva en contornas rurais.

Constan dun espazo de acollida e información, onde se ofrecen servizos como o de alugueiro de bicicletas, servizo de limpeza, vestiarios ou duchas, así como información específica das rutas turísticas da zona na que está implantado. Forman parte do centro BTT un conxunto de rutas, de varios niveis de dificultade, que suman polo menos 100 quilómetros de lonxitude, convenientemente trazadas e sinalizadas pola comarca na que radica o centro.

 

Arriba