Hoxe disputarase no Real Club de Golf de Sevilla a última proba, antes da final que se celebrará en Galicia, do III Circuíto de golf sénior Turismo de Galicia, organizado pola Xunta de Galicia, a través de Turismo de Galicia, co obxectivo de consolidar a Comunidade galega como destino turístico de golf.

Este torneo desenvólvese logo da celebración do I e II circuítos de golf sénior Turismo de Galicia, que tiveron lugar nos anos 2011 e e 2012 e nos que participaron máis de 700 golfistas de toda España.

As probas do III Circuíto de golf sénior Turismo de Galicia celébranse desde o pasado 26 de xuño, cando se iniciara o torneo na cidade da Coruña. Logo viñeron as probas en Bilbao, Burgos, Asturias, Tarragona, Navarra, Pantón, Madrid, Valladolid, Salamanca e Santander, antes da que se celebre mañá a competición en Sevilla. En canto á final deste circuíto, celebrarase entre os días 19 e 22 de novembro no campo de golf do Balneario de Mondariz, en Ponteareas.

Produto turístico
Desde o punto de vista da promoción turística de Galicia, o Circuíto de Golf sénior consiste na creación dun produto destinado ao xogador de golf sénior, concibido mediante a combinación de tres atributos específicos integrados nas fortalezas da oferta turística galega: termalismo, gastronomía e campos de golf.

Os obxectivos do produto de golf sénior son, por unha parte, posicionar Galicia como o destino ideal para o xogador de golf de máis idade e atraer os xogadores nacionais deste perfil para que visiten a Comunidade galega, ofrecéndolles unha alternativa turística diferenciada e altamente valorada por estes.

Ademais, con esta iniciativa, preténdese servir de enlace entre a industria do golf e a industria turística local.

Este circuíto de golf facilitará tamén a presentación da oferta de campos e servizos turísticos mediante un produto estratexicamente diferenciado.

Operadores norteamericanos
Por outra parte, a pasada fin de semana visitaron Galicia un grupo de catro operadores turísticos norteamericanos para coñecer o Camiño do Norte, logo de chegar a Ribadeo no Tren Transcantábrico.

Na súa estadía visitaron distintos puntos de interese do Camiño do Norte entre Ribadeo e Santiago de Compostela, ademais da Cidade do Apóstolo e o Pazo de Oca.