O Campo da Festa de Lestedo, en Boqueixón acolleu hoxe a trixésimo primeira edición da súa Festa da Filloa, un evento de exaltación gastronómica que conta coa declaración de Festa de Interese Turístico de Galicia dende 2008.

A conselleira do Medio Rural e do Mar, Rosa Quintana e a directora de Turismo de Galicia, Nava Castro Domínguez, asistiron á festa na que a esta última lle foi imposto o ‘Mandil de Honra’. Na súa internvención destacou que se trata dunha das celebracións máis singulares da comunidade para exaltar un dos produtos máis auténticos e característicos dos Entroidos galegos. No acto tamén participaron o secretario xeral de Política Lingüística, Valentín García, e o director xeral de Xuventude e Voluntariado, Ovidio Rodeiro.

A directora de Turismo resaltou tamén que esta é unha das primeiras exaltacións gastronómicas da filloa e conta dende 2008 coa declaración de Festa de Interese Turístico de Galicia en recoñecemento a esta tradición, á singularidade de que se fagan cunha filloeira artesanal e “ao feito de que todo o pobo participe desta celebración que exalta o mellor que temos os galegos, a hospitalidade e a gastronomía”. Ao tempo, Nava Castro incidiu en que dende Turismo de Galicia “somos conscientes de que o Camiño de Santiago, o noso patrimonio natural e cultural e mais a enogastronomía son os valores diferenciais que fan de Galicia un destino único”.

A directora de Turismo comentou que unha das liñas estratéxicas do Plan Integral de Turismo pasa por potenciar a oferta turística baseada no patrimonio e nos recursos endóxenos, buscando a desestacionalización e os novos públicos. “A enogastronomía forma parte deses recursos que atesouramos e que nos distinguen pola calidade e autenticidade”, engadiu.

De igual modo, explicou que Turismo de Galicia deseñou un programa para o desenvolvemento e promoción do produto transversal do turismo enogastronómico. E engadiu que nel inclúense accións como a promoción das festas de exaltación. A estratexia de promoción das festas de interese turístico pasa, segundo explicou a directora, pola planificación, organización e difusión das festas de interese turístico nacional, internacional e galegas para acadar a máxima repercusión das mesmas nos territorios.