A directora de Turismo de Galicia, Nava Castro Domínguez foi a encargada de abrir hoxe o seminario que se celebra en Santiago de Compostela baixo o título Summer Seminar 2014 The Council of Europe Cultural Routes e no que participan representantes de itinerarios culturais de Europa así como do Consello de Europa e mais do Instituto Europeo de Itinerarios Culturais. No acto inaugural interviñeron tamén o presidente do Intergrupo Parlamentario Camiños de Santiago, Francisco Millán Mon e mais a directora do Instituto Europeo de Itinerarios Culturais, Penelope Denu.

Nestas xornadas de traballo participan representantes de diversos itinerarios que, como o Camiño de Santiago, contan coa declaración de Itinerario Cultural Europeo, así como representantes de itinerarios culturais que están a traballar para conseguir o citado recoñecemento a nivel europeo.

No acto de apertura do encontro, que se celebra no marco da conmemoración do VIII Centenario da Peregrinación de San Francisco de Asís a Santiago, a directora de Turismo de Galicia explicou a relevancia dos itinerarios, nomeadamente do Camiño de Santiago como Primeiro Itinerario Cultural Europeo, no proceso de construción de Europa.

Ao tempo, resaltou a importancia que supuxo o recoñecemento como Primeiro Itinerario Cultural Europeo en 1987 para o Camiño de Santiago a nivel de proxección internacional e de difusión da idea de que a Ruta Xacobea ten funcionado como elemento de cohesión e intercambio cultural no vello continente. Lembrou tamén que o Camiño de Santiago ten dado orixe á primeira gran rede asistencial de Europa así como o seu papel como verdadeira panca para o desenvolvemento e a evolución da civilización europea.

O Camiño de Santiago como eixo vertebrador da oferta turística galega
Nava Castro incidiu tamén na hospitalidade do Camiño como elemento diferencial da oferta turística de Galicia e como gran atractivo para os visitantes á Comunidade, así como na relevancia de establecer mecanismos de conservación, de posta en valor turística e patrimonial, así como de difusión do valor e da importancia dos itinerarios culturais europeos como herdanza dos pobos e verdadeiros elementos diferenciais dos territorios que atravesan.

De igual modo, a directora de Turismo de Galicia resaltou o feito de que os peregrinos teñen sido “os mellores prescriptores de opinión do noso destino” así como o papel fundamental das Asociacións de Amigos do Camiño de Santiago dado que “funcionan como verdadeiros embaixadores do Camiño de Santiago en todo o mundo e son xa máis de 200 verdadeiros altofalantes da Ruta Xacobea en todo o planeta”. A directora de Turismo lembrou a celebración en maio de 2015 en Santiago do Primeiro Encontro de Asociacións de Amigos do Camiño así como do Primeiro Congreso Internacional de Peregrinacións e Turismo, no marco dos actos conmemorativos do VIII centenario.

Nava Castro falou tamén do Camiño de Santiago como eixo vertebrador da oferta turística de Galicia e como a porta de entrada aos produtos e recursos que converten ao destino Galicia nun destino diferencial e único, ao tempo que destacou a capacidade de internacionalización do destino Galicia a través da Ruta Xacobea.

Ademais das sesións de traballo, os asistentes a este encontro terán ocasión de visitar algúns dos principais recursos turísticos da Comunidade galega, como a Ribeira Sacra, así como de percorrer un tramo do Camiño de Santiago.