O mercado internacional presenta en xuño en Galicia un incremento do 14,2% en viaxeiros e do 9% en pernoitas. Nos hoteis as pernoitas de viaxeiros estranxeiros medraron en xuño un 6,4% e nos establecementos extrahoteleiros medraron un 36,1%.

O turismo internacional acada así máximos históricos no mes de xuño en Galicia, tanto en termos de volume, con 141.000 viaxeiros e 220.000 pernoitas, como de peso no conxunto da demanda, representa o 35,6% dos viaxeiros aloxados e o 28,7% das pernoitas rexistradas.

Total de viaxeiros na oferta regrada
En xuño Galicia rexistrou un incremento no volume de viaxeiros aloxados nos establecementos regrados da comunidade do 4,3%, ata situarse nos 395.790 viaxeiros. A cifra de pernoitas subiu un 6% e alcanzou as 768.306. A cifra de viaxeiros acada así en xuño o máximo histórico rexistrado en Galicia nun ano non Santo.

A nivel estatal a cifra de viaxeiros aloxados nos establecementos regrados subiu un 3,2% e a de pernoitas un 2,3% en xuño.

Os establecementos extrahoteleiros de Galicia rexistraron en xuño un aumento na cifra de viaxeiros do 5%. Os viaxeiros en establecementos hoteleiros medraron en xuño un 5,4%. No caso do mercado nacional a cifra de pernoitas medrou en xuño un 4,9% no conxunto da oferta regrada.

Os establecementos de turismo rural rexistraron en xuño unha suba do 23,7% na cifra de viaxeiros e do 20,2% na cifra de pernoitas rexistradas.

Aumento do gasto turístico internacional en xuño dun 38,3%
O gasto total dos turistas estranxeiros en Galicia no mes de xuño situouse por enriba dos 77 millóns de euros -77.166.799-, un 38,3% máis que no mesmo mes do ano pasado.

No primeiro semestre do 2014 o gasto dos turistas estranxeiros ascendeu a 354.163.719 euros o que supón un incremento do 20,3% con respecto ao primeiro semestre do 2013.

Máximo histórico do peso do turismo internacional no primeiro semestre
No primeiro semestre deste ano o conxunto da oferta de aloxamento regrado de Galicia rexistrou un aumento na cifra de viaxeiros do 5,5% e da cifra de pernoitas do 3,9%. En total, nos seis primeiros meses do ano, Galicia recibiu 1,5 millóns de viaxeiros e rexistrou 2,8 millóns de pernoitas. A nivel estatal a cifra de viaxeiros medrou un 4,9% e a de pernoitas un 4,2% nos primeiros seis meses deste ano con respecto ao mesmo período de 2013.

O turismo internacional en Galicia no primeiro semestre subiu un 12,8% en viaxeiros e un 7,4% en pernoitas no conxunto da oferta regrada. Esta mellora supón que o mercado internacional acada no primeiro semestre do ano o seu máximo histórico de viaxeiros aloxados –máis de 416.000- e de pernoitas rexistradas -675.000 -. O peso do turismo internacional no conxunto da demanda neste período acada tamén o seu máximo histórico co 27,5% dos viaxeiros e o 23,6% das pernoitas regradas.

Os establecementos hoteleiros rexistraron neste período subas do 4,8% en viaxeiros e do 3,1% en pernoitas. Os establecementos extrahoteleiros rexistraron no primeiro semestre unha suba do 15,2% na cifra de viaxeiros e do 12,9% na cifra de pernoitas.

Dentro do segmento extrahoteleiro, os establecementos de turismo rural rexistraron un aumento na cifra de viaxeiros do 25,1% e da cifra de pernoitas do 27,1% a respecto do primeiro semestre de 2013.

Un 9,10% máis de peregrinos que en 2013
Dende o 1 de xaneiro de 2014 ata o 31 de xullo chegaron a Santiago un total de 121.146 peregrinos. Deles, o 54,45% son estranxeiros e o 45,55% son españois. No que vai de ano, recolleron a Compostela na Oficina de Acollida ao Peregrino de Santiago 10.107 peregrinos máis que os que o fixeron no mesmo período do ano pasado, o que supón un incremento do 9,10%.