En agosto rexistrouse un incremento no volume de viaxeiros aloxados nos establecementos hoteleiros do 8,4% ata situarse nos 626.265 viaxeiros. A cifra de pernoitas subiu un 3,7% e alcanzou o 1.334.309. Este incremento dos volumes de demanda sitúa o nivel de viaxeiros aloxados de agosto deste ano en máximo histórico na nosa Comunidade, nunca antes se superara da cifra de 600.000 viaxeiros en agosto.

A nivel estatal a cifra de viaxeiros nos establecementos hoteleiros subiu un 5% e a de pernoitas nun 2,7%, situando Galicia nunha posición intermedia.

O bo comportamento da demanda prodúcese como consecuencia do crecemento rexistrado polo turismo receptor. O turismo receptor nacional sobe un 3,5% acadando preto de 850.000 pernoitas -a cifra máis elevada dos últimos catro anos- e o turismo internacional increméntase nun 11,5%.

Continúa, polo tanto, a tendencia positiva observada nestes últimos anos que leva a situar os niveis do turismo internacional en Galicia en máximos históricos tanto de volume –con preto de 150.000 viaxeiros e 250.000 pernoitas- como de peso no conxunto da demanda –representa neste oitavo mes do ano o 24% dos viaxeiros e o 18,4% das pernoitas hoteleiras-.

O incremento da demanda produciuse nun contexto no que creceu nun 1,2% a oferta. En termos globais isto supón unha mellora do nivel de ocupación dos hoteis e pensións de Galicia que supera en 1,3 puntos porcentuais o dato do pasado ano.

Cómpre destacar ademais que a mellora das cifras de ocupación hoteleira se produciu nun contexto no que as tarifas hoteleiras soben levemente o que permitiu aos establecementos hoteleiros de Galicia mellorar neste oitavo mes do ano os seus niveis de rendibilidade empresarial –o RevPar hoteleiro incrementouse nun 2,6%-.

 

Os niveis de demanda deste ano os máis elevados desde o último Xacobeo

Nos primeiros oito meses deste ano 2014 Galicia rexistra un incremento da cifra de viaxeiros aloxados nos establecementos hoteleiros da comunidade, do 6,1% en relación ao pasado ano, rexistrando preto de 2,5 millóns.

Soben tamén as pernoitas, un 3,3% neste caso, ao rexistrarse case 4,9 millóns neste período.

É o segundo ano consecutivo no que se observa unha mellora dos niveis de demanda hoteleira neste período de oito meses, situando os niveis de demanda deste ano nos máis elevados desde o último Xacobeo 2010.

A nivel estatal obsérvase tamén unha mellora dos niveis de demanda hoteleira, do 4,3% no relativo á cifra de viaxeiros aloxados e do 2,8% no que atinxe ás pernoitas.

En termos de mercado obsérvase que o mercado receptor nacional sobe nun 3,2% mentres que o internacional presenta un incremento acumulado do 7,8%.

O turismo internacional acada en Galicia o máximo histórico de viaxeiros aloxados, superando por vez primeira o nivel dos 600.000 neste período de oito meses; de pernoitas, con algo máis dun millón; e de peso no conxunto da demanda, co 26,4% dos viaxeiros e o 22% das pernoitas acumuladas.

O incremento da demanda permite mellorar as cifras de ocupación do sector, en algo máis dun punto porcentual en concreto.

O mercado internacional incrementouse nun 10,6% este verán

Neste verán de 2014, nos meses de xullo e agosto, Galicia rexistrou unha mellora notable dos seus niveis de demanda hoteleira superando nun 7,9% a cifra de viaxeiros aloxados e nun 3,5% o nivel de pernoitas do anterior verán de 2013.

O bo comportamento da demanda permite situar o nivel de viaxeiros aloxados en máximos históricos na nosa comunidade con case 1,1 millóns neste período.

O resultado positivo do verán débese aos incrementos rexistrados tanto no mes de xullo coma en agosto –do 3,2% no primeiro e do 3,7% no segundo, porcentaxes ambas referidas ás pernoitas-.

En canto aos segmentos de demanda hoteleira, sobe o mercado nacional nun 2,7% e o internacional increméntase nun 10,6% acadando neste caso máximos históricos tanto de viaxeiros aloxados –con 270.000- coma de pernoitas –con 440.000 nestes dous meses-.