Cun incremento do 6,8% no número de viaxeiros rexistrados nos establecementos hoteleiros do seu territorio, Galicia vén de acadar a cifra de turistas máis elevada dos últimos cinco anos neste mes.

Por segundo ano consecutivo rexístrase unha mellora dos niveis de demanda hoteleira en Galicia no mes de abril, circunstancia que permite chegar á cifra de preto de 300.000 viaxeiros –no Xacobeo 2010 rexistráranse algo máis de 302.000 no conxunto da comunidade-.

Canto ás pernoitas, estas medraron un 7,1% en abril, en relación ao mesmo período de 2014, o que supuxo un volume de máis de 530.000.

No ámbito estatal, Galicia medra por riba da media, xa que a suba dos niveis de demanda hoteleira foron do 4,6%, no relativo á cifra de viaxeiros aloxados, e do 3,6% no que atinxe ás pernoitas.

Viaxeiros estranxeiros
Polo que atinxe á demanda de viaxeiros estranxeiros, cabe salientar un forte crecemento que permite a este segmento acadar máximos históricos de volume –tanto de viaxeiros aloxados, con algo máis de 81.000, como de pernoitas, con preto de 125.000- así como de peso no conxunto da demanda, xa que supón neste cuarto mes do ano o 27,8% dos viaxeiros e o 23,4% das pernoitas.

O turismo receptor presenta tamén un comportamento positivo, tanto aquel que procede do exterior, que sobe un 16,5%, como o do conxunto do Estado, segmento que neste caso increméntase nun 10,0%.

Rendibilidade empresarial
Canto á rendibilidade dos establecementos, as tarifas hoteleiras en Galicia subiron neste cuarto mes do ano un 2,6%.

Neste ámbito, a mellora dos niveis de demanda e ocupación neste mes de abril, permitiulles aos establecementos hoteleiros da comunidade galega incrementar os niveis de rendibilidade en relación ao mesmo período de 2014. Así, o RevPAR medrou un 10,6%.

Primeiro cuadrimestre
Polo que respecta aos primeiros catro meses do ano 2015, Galicia rexistrou un incremento da cifra de viaxeiros aloxados nos establecementos hoteleiros da comunidade, do 11,2% en relación ao mesmo período do pasado ano, acadando preto de 800.000 turistas. Tamén medraron as pernoitas, neste caso nun 7,1%, rexistrándose preto de 1,5 millóns.

O bo comportamento da demanda neste cuadrimestre vén como consecuencia dos incrementos rexistrados nos catro meses considerados, e particularmente en marzo –cando as pernoitas subiron nun 15% fronte ao 1,9% de xaneiro e ao 1,4% de febreiro-.

En termos de intensidade, os incrementos do 11% na cifra de viaxeiros e do 7% no volume de pernoitas son os máis elevados dos últimos anos.

O notable incremento do turismo internacional conlevou que este mercado acadase un máximo histórico de viaxeiros aloxados nos establecementos hoteleiros de Galicia con máis de 160.000 no primeiro cuadrimestre do ano, representando o 20% dos viaxeiros e o 19% das pernoitas hoteleiras neste período.

O turismo receptor nacional –aquel que corresponde aos españois procedentes doutras comunidades autónomas- incrementouse tamén nestes catro meses nun 9% mentres que o internacional subiu un 17% -porcentaxes que se incrementan ata o 11% e 22% respectivamente no relativo aos viaxeiros aloxados.

Datos FRONTUR
Segundo os datos da Enquisa de Movementos Turísticos en Fronteiras (FRONTUR), no pasado mes de abril rexistráronse 69.804 turistas estranxeiros con destino principal Galicia, cifra que supón un incremento do 11,7% en relación a abril do pasado ano.

Portugal, co 47,7% dos turistas estranxeiros, continúa sendo o principal mercado emisor internacional de Galicia e seguen en orde de importancia Francia co 17,6% e Reino Unido co 10,4% neste caso.

Segundo esta fonte, no primeiro cuadrimestre deste ano rexistráronse máis de 256.000 turistas estranxeiros con destino .