artesanía como produto turístico de primeira orde que complementa a outros máis consolidados como o Camiño de Santiago, o turismo rural ou o turismo urbano.

A directora fixo estas declaracións con motivo da súa participación no showcooking gastronómico O Paladar no marco do V Encontro de Artesanía Tradicional e Popular de Galicia, Corazón de Artesanía, celebrado en Agolada.

Nava Castro explicou que o seu departamento está traballando no impulso da artesanía, símbolo do marcado carácter tradicional de Galicia, como recurso turístico. Así, puxo como exemplo da potencialidade da artesanía como reclamo turístico as Rutas da Artesanía de Galicia, que integran todos os talleres visitables da Comunidade cos lugares de interese relacionados coa artesanía.

Apoio de Turismo á artesanía galega

O Plan Integral de Turismo recolle a revalorización da artesanía de Galicia como elemento tradicional e cultural diferenciador, fomentando a cooperación entre empresas turísticas e actores e produtos artesanais.

Este Plan contempla, entre outras accións, o apoio para a apertura profesional de obradoiros artesanais aos turistas, así como á creación de novos produtos que liguen turismo e artesanía.

Así mesmo, a través de diversas iniciativas, o Plan aposta polo desenvolvemento dun programa específico para potenciar a colaboración entre as empresas artesáns e as empresas turísticas, o fomento de accións de difusión turística do valor engadido dos produtos artesáns e do saber facer dos seus profesionais e o impulso de accións para a mellora do posicionamento e comercialización da artesanía de Galicia enfocada ao turismo, segundo dixo a directora.