De xeito global, este curso académico formaranse no Centro Superior de Hostelería de Galicia un total de 244 alumnos, dos que 224 estudan algún dos catro cursos do grao en Xestión de Empresas Hostaleiras, e 20 o novo Curso Superior de Chef en Cociña e Pastelería, o que supón un incremento global do 37% do seu alumnado.

 

Estes resultados son froito das medidas postas en marcha nos últimos meses pola Xunta para flexibilizar o acceso a estes estudos no seu obxectivo por afondar na profesionalización do turismo. Entre as medidas incluise a reducción do prezo da matrícula, o incremento das bolsas de formación e nova oferta formativa no eido da gastronomía. Tamén se afondou nas políticas de retorno para aproveitar o talento con raíz galega e afrontar o reto demográfico, co que se outorgaron por primeira vez bolsas para fillos de galegos residentes no estranxeiro, das que foron beneficiarias seis persoas procedentes de Arxentina, Brasil, Colombia e Portugal. 

 

Xunto a estas medidas, e para dar resposta á crecente demanda do sector da restauración en Galicia, o CSHG ofertará o Curso Superior de Chef e Pastelería, un título propio que empeza este curso 2024-25, con tres meses de prácticas en restaurantes de Galicia.  Durante estes meses, o CSHG realizou unha importante campaña de captación que incluiu chegar a máis de 8.000 potenciais candidatos a estudar no centro, o triple que o curso pasado. Contactouse cos orientadores de todos os institutos e colexios de Galicia e iniciouse un proceso de achegamento noutras comunidades autónomas de España. Fixéronse 120 accións informativas para centros educativos, o dobre que o curso anterior, celebráronse 16 xornadas de portas abertas e se intensificou a presenza do centro en feiras de formación. 

 

Ademais, asináronse convenios de colaboración con entidades galegas sectoriais para incentivar o acceso a novos perfiles para este curso. Tamén coas cadeas hoteleiras Meliá Hotels International, Barceló Hotels & Resorts, Vincci Hotels, Iberostar Hotels & Resorts, Elba Hoteles e Palladium Hotels & Resorts baixo o novo programa Partners para incentivar as prácticas e para que o seu persoal se beneficien de axudas para estudar no CSHG o grao en Xestión de empresas Hosteleiras e o Curso Superior de Chef en Cociña e Pastelería. Gracias a estes acordos, xa se incorporaron no curso 2024-25 sete alumnos.

 

Xunto a estas novidades, durante este curso afianzarase tamén o papel do CSHG para afondar na profesionalización dos traballadores do turismo en Galicia. Así, desenvolverase o Plan para a Formación en Competencias Dixitais do Sector Turístico con cursos de 150 horas a traballadores turísticos e vén de licitarse a posta en marcha do Galician Food Experience, o Hub gastronómico de formación dirixido ao sector que se creará no CSHG, cun investimento de 1,2M€. A iniciativa é unha das accións previstas no Plan Territorial de Sostibilidade Turística Enogastronomía de Galicia, deseñado polo goberno autonómico con fondos Next Generation.

 

Formación de excelencia

O Centro Superior de Hostalería de Galicia leva décadas formando xestores  e directivos de empresas turísticas, dependente da Xunta de Galicia, e comezou nos seus inicios ofertando unha formación propia en Dirección Hoteleira e Gastronomía. Desde o ano 2021 está adscrito á Universidade de Santiago de Compostela e imparte o Grao universitario en Xestión de Empresas Hostaleiras coas especialidades de gastronomía e de dirección hostaleira. 

 

Conta con 54.000 metros cadrados, cinco edificios, aulas específicas de hostalaría e equipamento actualizado e moderno que ten un impacto sempre positivo á hora de elixir o CSHG. Neste último ano fixéronse melloras nas instalacións.