Catro xornalistas arxentinos, que representan aos medios de comunicación Clarín, Cuisine et vins, Lugares e Travel Magazine, realizaron recentemente unha viaxe de familiarización por territorio galego, ao obxecto de coñecer a oferta turística da comunidade.

Os xornalistas arxentinos chegaron a Galicia procedentes de Asturias, nunha viaxe organizada pola marca turística España Verde, integrada por Galicia, Asturias, Cantabria e Euskadi.

Na súa estadía, que se estendeu ata onte, os xornalistas arxentinos puideron coñecer as Rías Altas, a Costa da Morte, Santiago de Compostela, a Mariña Lucense, as Rías Baixas e a comarca de Deza-Tabeirós.

Programa
Os visitantes puideron coñecer a praia das Catedrais, en Ribadeo (Lugo). Ademais visitaron as vilas de Viveiro, Ortigueira e Cariño; o lugar de Santo André de Teixido e a contorna de Víxía Herbeira. Tamén se achegaron ata á cidade da Coruña.

Os  xornalistas de Clarín, Cuisine et vins, Lugares e Travel Magazine visitaron tamén a Costa da Morte - Muxía e Fisterra- e Santiago de Compostela.

Es grupo de prensa da Arxentina realizou unha visita guiada pola cidade de Santiago de Compostela e visitou o Pazo de Oca, para logo emprender viaxe cara ás Rías Baixas, con parada na praia da Lanzada. Xa na provincia de Pontevedra, realizaron unha visita a Combarro e á cidade de Pontevedra, para logo emprender viaxe cara a Baiona. Trasladáronse tamén á Guarda, con visita ao monte de Santa Trega, tour por Tui, e percorrido pola cidade de Vigo, con visita ao Pazo de Quiñones de León.

Sunday Telegraph

Por outra parte, a xornalista británica Anne Bennet, do suplemento Sunday Tlegraph, estivo estes días pasados en Galicia para participar da celebración da Noite de San Xoán na Coruña.

Ademais, visitou a vila de Viveiro para recoller material co que elaborará un artigo para a sección do seu medio de comunicación Secret Seaside.