Turismo de Galicia

O Xacobeo 2027 é unha oportunidade para divulgar a riqueza de valores que engloba o Camiño de Santiago e está concibido, ademais, como un evento participativo, no que teñen un papel importante as achegas da sociedade civil e tecido empresarial como vertebradores territoriais e palanca de desenvolvemento económico, cultural, social e territorial.

Trátase dun evento de alcance internacional para o que se deseña un programa que impulsa a dinamización turística e cultural e que estimula a participación do sector privado nos proxectos relacionados co Xacobeo 2027. 

Foi declarado Acontecemento de Excepcional Interese Público aos efectos da aplicación de beneficios fiscais, en virtude do establecido no artigo 1 f do Real Decreto-lei 8/2025, do 8 de xullo.  Esta declaración fomenta a participación privada no programa conmemorativo do Xacobeo 2027 e contribúe ao desenvolvemento social e económico. A duración do programa segundo o artigo 2 f abarca do 1 de xullo de 2025 ao 30 de xuño do 2028.

A entidade encargada da execución e programas relacionados co Xacobeo 2027 é a Axencia Turismo de Galicia segundo o acordo do Consello da Xunta de Galicia do 15 de decembro de 2025. As formas xurídicas mediante as que as persoas físicas e xurídicas poden contribuír á programación do Xacobeo 2027, así como a proxección e mellor visibilidade da marca Xacobeo 2027 son basicamente tres:

• Convenio de colaboración con empresas
• Contrato de patrocinio
• Convocatorias públicas e competitivas