O mercado internacional marca máximos históricos en Galicia superando un 29% a cifra de viaxeiros e un 21% a cifra de pernoitas rexistradas en xuño de 2012 en establecementos hoteleiros
A cifra de viaxeiros aloxados en establecementos hoteleiros galegos subiu no mes de xuño un 8,6% a respecto do mesmo mes de 2012.
No mes de xuño rexistráronse 341.784 viaxeiros que efectuaron 624.387 pernoitas, un 0,4% máis que as rexistradas no mesmo período do ano pasado.
En termos de viaxeiros Galicia lidera o crecemento a nivel estatal neste período e amosa o mellor comportamento da España Verde.
No primeiro semestre do ano a cifra de viaxeiros estranxeiros aloxados en establecementos hoteleiros en Galicia subiu a respecto do mesmo período de 2012 un 15% e o peso do turismo internacional no conxunto da demanda acada por primeira vez o 25,9%.
A cifra de viaxeiros aloxados nos establecementos hoteleiros galegos subiu un 8,6% neste mes de xuño a respecto do mesmo mes de 2012. En total, rexistráronse 341.784 viaxeiros. A cifra de pernoitas neste mesmo período – con 624.387- subiu tamén case medio punto a respecto das rexistradas no mesmo mes do ano pasado. De modo que, con estas cifras, Galicia lidera en termos de viaxeiros aloxados en establecementos hoteleiros o crecemento a nivel estatal e amosa o mellor comportamento da demanda neste mes de xuño en comparación co resto das comunidades da España Verde.
Neste mes de xuño o turismo estranxeiro ten acadado máximos históricos en Galicia cunha suba na cifra de viaxeiros aloxados do 29% e da cifra de pernoitas de viaxeiros estranxeiros aloxados do 21% a respecto das cifras rexistradas en xuño de 2012. De xeito que, por primeira vez, a cifra de viaxeiros estranxeiros supera a barreira dos cen mil neste sexto mes do ano.
Se se teñen en conta os datos dos primeiros seis meses de 2013 a respecto do primeiro semestre de 2012, a cifra de viaxeiros aloxados nos establecementos hoteleiros de Galicia ten subido un 1,3% e o turismo internacional ten rexistrado unha suba do 15% no que respecta á cifra de viaxeiros estranxeiros aloxados nos hoteis e pensións de Galicia e do 11% na cifra de pernoitas realizadas por este segmento entre xaneiro e xuño deste ano.
Tendo en conta estas subas, o turismo internacional ten acadado neste semestre o máximo histórico de viaxeiros e de peso no conxunto da demanda en Galicia, acadando un 25,9% do total.
