A Xunta de Galicia, a través de Turismo de Galicia, promoveu o turismo ornitolóxico da Comunidade galega entre os días 28 de febreiro e 2 de marzo na Feira Internacional do Turismo Ornitolóxico, FIO, que se celebrou en Monfragüe, Estremadura, que está considerado o certame turístico máis importante de España nesta modalidade.

Nesta feira, que se desenvolveu no Parque Nacional de Monfragüe, Turismo de Galicia instalou un recinto de nove metros cadrados co obxecto de poñer en valor o patrimonio natural de Galicia e a súa riqueza ornitolóxica.

Neste eido, Turismo de Galicia ten desenvolvido a ornitoloxía como produto turístico galego e así, editou un folleto cos dez lugares máis importantes da Comunidade Autónoma para o albiscamento de aves, tanto na costa como no interior: a ría de Ortigueira e Cariño, Estaca de Bares e a ría do Barqueiro, a ZEPA da Limia, Oímbra, Monterrei e Verín; a serra da Enciña da Lastra, a Costa da Morte, Montes de Cervantes (Os Ancares), os Humidais da Terra Chá e a Ribeira Sacra.

Meetings Space Spring
Por outra parte, Turismo de Galicia estivo presente tamén en Madrid na xuntanza de traballo relacionada co Turismo de reunións Meetings Space Spring, organizada para a promoción desta modalidade turística nas distintas comunidades autónomas españolas.

Durante  tres días, Turismo de Galicia mantivo xuntanzas de traballo con provedores e destinos turísticos europeos ao obxecto de promover as posibilidades que ofrece a Comunidade galega para a organización de congresos, xuntanzas de empresa ou viaxes de incentivo.