Turismo de Galicia ofrece hoxe en Málaga unha conferencia enmarcada nos actos de clausura do programa Inverno Xacobeo que se celebra nesa cidade dende o día 17 deste mes e que conta coa colaboración do Ateneo e da Asociación de Amigos do Camiño de Málaga.

A conferencia, titulada O Camiño de Santiago, unha visión mística e cultural, será impartida polo técnico da S.A. de Xestión do Plan Xacobeo Francisco Singul no Ateneo malagueño e versará sobre aqueles aspectos máis significativos e vinculados coa cultura da peregrinación xacobea e a mentalidade que a fixo posible, froito da cosmovisión do Occidente medieval.

Dentro deste programa que se clausura hoxe, Turismo de Galicia tamén organizou a exposición fotográfica Santiago-Kumano. Camiños de Peregrinación do fotógrafo xaponés Tomohiro Muda e do finado artista vigués Luís Ocaña.

Esta mostra Santiago- Kumano. Camiños de Peregrinación de Tomohiro Muda e Luís Ocaña enmárcase na celebración do Ano Dual España-Xapón, no que se conmemoran 400 anos de relacións entre os dous países. A exposición contrapón as vivencias fotográficas do galego Luís Ocaña no seu percorrido polo camiño sagrado de Kumano Kodo en Xapón e as do xaponés Tomohiro Muda no seu percorrido polo Camiño de Santiago. Esta exposición itinerante xa se amosou en lugares como Tanabe e Tokyo, en Xapón; ou en París e Santiago de Compostela.

Outros eventos do ciclo Inverno Xacobeo foron a conferencia O Camiño de Santiago e as vías pecuarias a cargo do avogado e responsable de Vías Pecuarias da Consellería de Medio Ambiente da Junta de Andalucía, José Gallardo Velázquez; ou a representación da obra O Camiño. Imaxes, sons e sentimentos, escrita e dirixida por Fernando Santos Urbaneja.