O Clúster tamén se compromete a acadar o mantemento dos 208 establecementos que están nos procesos necesarios para manter a marca de Calidade Turística O Consello da Xunta aprobou o acordo polo que se autoriza a subscrición do convenio de colaboración entre Turismo de Galicia e o Clúster Empresarial de Turismo de Galicia para a implementación, difusión e promoción da marca Q de Calidade Turística no sector turístico galego.

O acordo ten un importe de 200.000 euros e ten por obxecto establecer as bases de colaboración entre Turismo de Galicia e o Clúster de Turismo de Galicia para a implementación, difusión e promoción dos servizos turísticos de Galicia coa marca Q de Calidade Turística, a través do apoio á implantación voluntaria en empresas turísticas de Galicia inscritas no Rexistro de Empresas e Actividades Turísticas da Xunta de Galicia. A Xunta de Galicia, a través de Turismo de Galicia, impulsa a calidade como factor de diferenciación das empresas turísticas e constitúe esta unha liña de actuación imprescindible na nova forma de enfocar a estratexia competitiva do sector turístico galego.

O Clúster de Turismo de Galicia é a única entidade en Galicia que agrupa e representa a toda a cadea de valor do sector turístico galego e en virtude do acordo que se aprobou comprometerase a prestar asesoramento para a implantación da marca Q de Calidade Turística nas empresas turísticas galegas, así como a acadar 25 novas auditorías externas para a consecución de novas Q de Calidade Turística.

Ao mesmo tempo, o Clúster comprometerase a acadar o mantemento dos 208 establecementos que están nos procesos necesarios para manter a marca de Calidade Turística, así como á súa difusión incorporando a súa imaxe corporativa e publicidade xeral nos seus documentos promocionais xenéricos, así como mediante a distribución do distintivo Q aos establecementos que acaden a súa primeira certificación en 2014, así como aos que a manteñan.

Turismo de Galicia comprometerase a prestar apoio técnico e profesional nos protocolos de traballo, información e funcionamento que deseñe o Clúster de Turismo de Galicia para a implementación do sistema de calidade; así como a incorporar a marca nos seus documentos promocionais xenéricos e á inclusión dun espazo específico para os establecementos certificados co Q na edición do folleto Calidade Turística de Galicia 2014.

Calidade Turística en Galicia

Galicia conta no balance de 2013 con 249 establecementos distinguidos con Q de Calidade Turística, sendo a segunda comunidade con máis distintivos do Estado.

Ademais, a comunidade galega lidera o ranking de distintivos en segmentos como o turismo rural, o turismo termal, o turismo activo, o turismo industrial, as instalación náutico-deportivas e o lecer nocturno. Ademais, Galicia conta con 5 destinos SICTED con 294 distinguidos en 2013.