Turismo de Galicia presentou a oferta turística galega en Kazajistán
Turismo de Galicia participou tamén na feira de turismo máis importante deste país asiático, un mercado emerxente interesado nos destinos españois.
Tamén se inauguraou na cidade polaca de Bialystok unha exposición fotográfica organizada por Turismo de Galicia.
Representantes de Turismo de Galicia participaron na cidade de Almaty na presentación da oferta turística de Galicia aos operadores turísticos máis importantes de Kazajistán.
Esta presentación é a primeira que se realiza neste país asiático, un dos mercados emisores emerxentes con maior interese polos destinos turísticos españois.
Deste xeito, Turismo de Galicia tomou contacto cos axentes de viaxes de Kazajistán, na cidade máis importante do país, para amosarlles as posibilidades que ofrece a comunidade galega no ámbito turístico e o Camiño de Santiago.
Por outra parte, Turismo de Galicia participou por primeira vez na feira turística máis importante deste país co obxectivo de promocionar entre os operadores turísticos e o público xeral a oferta turística galega.
Exposición fotográfica en Polonia
Dentro do ámbito da promoción do turismo galego, recentemente se inaugurou no Centro cultural de Bialystok (Polonia) unha exposición fotográfica organizada por Turismo de Galicia que representa o mellor da paisaxe, os costumes e as festas da Comunidade galega.
Trátase de 51 fotografías de gran formato que se mostrarán ao público desta cidade de máis de 300.000 habitantes ata o día 7 de maio.
Turismo de Galicia conta coa colaboración da Oficina de Turismo de España en Varsovia e das autoridades culturais locais da cidade polaca.
Para a difusión deste evento na cidade polaca editáronse 1.000 folletos que se distribuirán en distintos lugares senlleiros de Bialystok e 15 pósters que se colocarán en oficinas de Turismo e lugares públicos con gran presenza de público.