Galicia rexistrou en abril un aumento do 23,6% na cifra de viaxeiros aloxados e un aumento do 18,4% na cifra de pernoitas en establecementos hoteleiros da Comunidade
A cifra de viaxeiros estranxeiros aloxados en establecementos hoteleiros medrou un 5 % a respecto de abril do ano pasado e alcanza así un máximo histórico neste mes, co 25% do total dos viaxeiros recibidos.
A cifra de viaxeiros e pernoitas rexistradas en Galicia en abril superan aos rexistrados no conxunto do Estado, que computa unha suba de viaxeiros do 15,5% e de pernoitas de preto do 16%.
O turismo interno medrou en abril un 17 % en Galicia e o receptor nacional subiu un 26%.
A cifra de pernoitas en establecementos hoteleiros en abril medrou en Lugo, un 46%; na Coruña, un 16%; en Pontevedra, un 14% e en Ourense, un 6,7%. As tarifas hoteleiras subiron un 2,3% e o RevPar por riba do 13%.
Os establecementos hoteleiros galegos rexistraron no mes de abril unha suba do 23,6% na cifra de viaxeiros aloxados e do 18,4% na cifra de pernoitas rexistradas. Estes datos positivos superan os rexistrados no conxunto do Estado, que computa unha suba de viaxeiros do 15,5% e de pernoitas de preto do 16%.
A Comunidade galega rexistrou ademais neste mes de abril o seu máximo histórico de viaxeiros internacionais aloxados nos establecementos hoteleiros. En total foron 66.582, o que supón un incremento do 14 % a respecto do mesmo mes do ano pasado e unha porcentaxe do 25 % do total dos viaxeiros aloxados neste tipo de establecementos.
Tamén o turismo dos galegos dentro de Galicia rexistrou un incremento do 17% en abril a respecto dos recibidos en abril de 2013. O turismo procedente doutras comunidades medrou en abril un 26 %.
De igual modo, as provincias galegas rexistraron aumentos nos niveis de demanda. Así, Lugo rexistrou unha cifra de pernoitas que supera nun 46 % as rexistradas en abril do ano pasado. A suba na Coruña foi do 16 % e en Pontevedra do 14%. En Ourense, as pernoitas subiron un 6,7 % a respecto de abril de 2013.
Tamén as tarifas hoteleiras rexistraron subas nese mes que alcanzan o 2,3%. O índice de rendibilidade empresarial mellorou nun 13,1 % a respecto do mesmo período do ano pasado.
Primeiro cuadrimestre
A dinámica de aumento na cifra de viaxeiros recibidos mantense tamén se se teñen en conta as cifras de viaxeiros recibidos nos catro primeiros meses de 2014. En total, aloxáronse nos establecementos hoteleiros galegos entre xaneiro e abril de 2014 un total de 706.259 viaxeiros, un 1,4% máis que no mesmo período de 2013.
Nese primeiro cuadrimestre subiu o turismo receptor nacional un 1 % e o nivel de ocupación media medrou 0,6 puntos porcentuais.
No tocante á cifra de peregrinos recibidos entre xaneiro e abril de 2014 tamén se rexistrou un incremento notable. Así, recolleron a Compostela un total de 22.354 peregrinos entre o 1 de xaneiro e o 30 de abril, un 6,7 % máis que no mesmo período do ano pasado.
