A cifra de viaxeiros aloxados nos establecementos turísticos regrados de Galicia medrou un 26,9% o pasado mes de abril en relación ao mesmo período do ano pasado
O incremento no mes de abril en Galicia situouse por riba da media española, que queda no 19,7 %, así como as pernoitas, que en Galicia subiron un 23,2% fronte ao 20% da media estatal.
Nos establecementos extrahoteleiros, o incremento do volume de viaxeiros foi do 92% e o do das pernoitas dun 110,2%.
Os establecementos turísticos regrados de Galicia rexistraron no pasado mes de abril un incremento do 26,9% no volume de viaxeiros aloxados e un incremento nas pernoitas do 23,2%, en relación ao mesmo mes do ano 2013.
Estes incrementos sitúan a Galicia por riba da media española que no pasado mes de abril rexistrou unha suba do 19,7%, no que atinxe aos viaxeiros aloxados, e dun 20% no relativo ás pernoitas.
Por tipos de aloxamento, no pasado mes de abril, o número de viaxeiros aloxados en establecementos hoteleiros incrementouse nun 23,6% e as pernoitas medraron un 18,4%. No caso dos establecementos extrahoteleiros –apartamentos turísticos, cámpings e aloxamentos de turismo rural- o incremento no número de viaxeiros en abril de 2014 comparado co mesmo período do ano anterior foi do 92% e as pernoitas medraron un 110%.
Establecementos extrahoteleiros
Polo que respecta aos datos acumulados no primeiro cuadrimestre do ano, o número de viaxeiros aloxados nos establecementos turísticos extrahoteleiros de Galicia, medrou nun 16,8%.
En canto as pernoitas destes primeiros catro meses do ano nos establecementos extrahoteleiros, o incremento foi do 23,5%.
Aumenta a demanda nos hoteis
En canto ao tipo de aloxamento, en abril, o 91,2% da demanda turística regrada correspondeu aos establecementos hoteleiros, porcentaxe que inclúe tanto aos hoteis –que representan un 73%- como ás pensións –co 18%- neste caso. O resto da demanda corresponde aos aloxamentos extrahoteleiros.
Deste xeito, o meirande incremento da demanda turística prodúcese nos hoteis, que, por outra parte, conforman máis do 70% do total do aloxamento regrado, aínda que a mellora da demanda turística neste mes de abril é xeneralizada e afecta a todas as tipoloxías de aloxamento.
