A directora de Turismo, Nava Castro, asinou hoxe en Madrid un acordo de colaboración coa Asociación Española de Estacións Náuticas, polo que o departamento que dirixe investirá un total de 20.000 euros na promoción da Estación Náutica de Galicia, a través de distintas accións de difusión e apoio á comercialización deste espazo situado nas Rías Baixas e cuxa sede se atopa no Porto Deportivo Juan Carlos I de Sanxenxo. No acto de rúbrica do acordo tamén participaron os representantes de Turismo de Andalucía, Cataluña, Ceuta, Comunidade Valenciana e Comunidade de Madrid.

Segundo o convenio asinado hoxe, desenvolverase un programa de accións encamiñadas á canle, con vistas á comercialización indirecta, e outras ao consumidor, co obxectivo de xerar tráfico e vendas directas no portal da Asociación Española de Estacións Náuticas (AEEN).

Dentro das accións destinadas á canle de comercialización, salienta a asistencia a feiras especializadas en Turismo en España, Francia e Alemaña. Así, neste acordo rexístrase a participación na Feira Internacional do Turismo de Madrid, FITUR, con accións de relacións públicas, presentación de produtos, entrega de bandeiras e contratación dun espazo específico de promoción.

Accións no exterior
Dentro deste apartado, tamén se recolle a participación na feira Salón Náutico de París, coa inclusión dunha campaña de relacións públicas con medios de comunicación e cliente final, a busca de axencias online co obxectivo de realizar contratos de afiliación e a publicidade en medios obxectivo.

Ademais, no ámbito da participación en feiras especializadas contémplase a asistencia ao Salón Náutico de Düsseldorf, cun stand orientado á participación das distintas comunidades autónomas asinantes, así como unha campaña de relacións públicas con medios de comunicación e clientes online.

Unidade de apoio á comercialización
Por outra parte, este convenio recolle unha unidade de apoio á comercialización por medio da mellora do portal www.estacionesnauticas.info, a organización de xornadas de aceleración comercial, mercadotecnia online, un plan de negocio do portal da AEEN e campañas de produto, así como a Festa do Mar.

No que atinxe á Unidade de apoio á comercialización, esta créase para incorporar todas as fases da xestión do produto: un observatorio de turismo náutico, un laboratorio de creación de novos produtos, a planificación estratéxica de produto e a operativa de comercialización.

Os principais obxectivos desta unidade son, entre outros, potenciar o modelo de negocio do portal www.estacionesnauticas.info, involucrar aos empresarios e ás canles de comunicación e consolidar os produtos turísticos especializados en náutica.

Aceleración comercial
O obxectivo do apartado Aceleración comercial é conseguir unha maior sincronización entre todos os axentes que participan na promoción do Club de produto estacións náuticas –Turespaña, as comunidades autónomas, entidades locais, as propias estacións náuticas e os empresarios- co propósito de acelerar a rendibilidade das accións orientadas á comercialización, creando indicadores de control que permitan executar as prioridades.

Ademais, segundo o convenio asinado hoxe, desenvolveranse accións de mercadotecnia online, ao obxecto de posicionar o portal de venda da AEEN .

Os puntos básicos desta acción están relacionados co posicionamento en buscadores da internet, programas de afiliación, ferramentas de testeo, posicionamento en redes sociais, a creación de weblogs e melloras tecnolóxicas para o portal da Asociación.

Ademais, ponse en funcionamento unha oficina de comunicación que será o organismo encargado de xerar notoriedade para darlle relevancia ao club de produto.

Plan de negocio do portal
Polo que respecta ao Plan de negocio do portal www.estacionesnauticas.info, o proxecto articulase en tres fases que inclúen as diferentes actividades que se levan a cabo no marco do proxecto: definición e estratexia de negocio, elaboración do plan de negocio e financiamento e pre-implantación do proxecto.

Por último, neste acordo prevense campañas de produto que permitan difundir os valores da AEEN e das súas instalacións asociadas.

Asociación Española de Estacións Náuticas
A AEEN é unha asociación sen ánimo de lucro que se creou en 1998, contado co apoio da Secretaría de Estado de Turismo e que na actualidade está formada por varios destinos repartidos por todo o litoral español das comunidades de Andalucía, Cataluña, Galicia, Murcia, Valencia, Madrid e Ceuta.

Unha estación náutica é un espazo turístico e recreativo que permite a práctica do turismo náutico, entendido como vacacións activas en contacto coa auga, coa posibilidade de realizar todo tipo de actividades náuticas en tempo de ocio. Ademais, ofrécese a posibilidade de conxugar a actividade náutica co aloxamento e o goce da natureza, así como a oferta turística e recreativa da contorna.

A AEEN funciona como club de produto turístico e ten o recoñecemento do Ministerio de Industria, Turismo e Comercio como Agrupación Empresarial Innovadora Turística.

Na actualidade, en Galicia funciona dentro desta categoría a Estación náutica Rías Baixas, no Porto Deportivo Juan Carlos I de Sanxenxo.