A directora de Turismo de Galicia participou a semana pasada nun encontro informal co conselleiro de Emprego e Seguridade Social da Embaixada de España en Arxentina, Santiago Camba; o conselleiro de Turismo, Horacio Díaz, e o xefe de Marketing, Ignacio Altable, da Oficina de Turismo do país.

Ao encontro, que tivo lugar no restaurante Bernata en Bos Aires, asistiron tamén representantes de Vietur, Turar, Fabtravel, Carnival Tours e Juliatours, os principais operadores turísticos arxentinos, aos que Nava Castro presentoulles o destino Galicia.

Nesta presentación, abordáronse as oportunidades turísticas de Galicia e as posibilidades da comunidade autónoma para a recepción de turistas arxentinos. O Camiño de Santiago e o fenómeno das peregrinacións, así como os principais produtos turísticos de Galicia relacionados coa costa, a gastronomía, o termalismo, o golf, o Turismo náutico, a natureza e a cultura, entre outros; protagonizaron o encontro.

Fortaleza do destino Galicia

Neste encontro profesional de Bos Aires, a directora de Turismo de Galicia referiuse tamén ás fortalezas turísticas da comunidade galega, nas que ademais das xa ditas, lembrou os catro bens declarados patrimonio da humanidade, a biodiversidade da comunidade galega, da que citou as rías como elemento identificador, así como a ampla costa galega que conta cunha lonxitude de 1.659 quilómetros e 863 praias.

Nava Castro tamén apelou ao liderado de Galicia en materia de turismo termal. “Contamos co 20% das estacións termais do estado”, manifestou, e “lideramos a cifra de distintivos de calidade neste sefmenteo”, engadiu.

Ademais, a directora de Turismo de Galicia referiuse á calidade como un dos valores máis importantes do destino, citando que a comunidade galega é a segunda con máis distintivos Q de Calidade turística, con 249 establecementos e servizos recoñecidos e “lideramos segmentos relacionados co turismo termal, rural e activo; instalacións náuticas, turismo industrial e ocio nocturno”, manifestou.

Neste ámbito, Nava Castro citou tamén o liderado de Galicia canto a bandeiras azuis e así trasladoulles aos empresarios turísticos arxentinos que a comunidade galega conta con 129 bandeiras en praias, 19 en portos deportivos e 15 sendeiros azuis.

Produtos turísticos

Durante o encontro, falouse do Camiño de Santiago como o primeiro produto que permite a Galicia diferenciarse de toda a oferta do resto de España.

Nava Castro explicou tamén nesta xuntanza a creación de novos produtos turísticos en Galicia, dos que citou o VIII Centenario da Peregrinación de San Francisco a Compostela, o Outono Gastronómico en Turismo Rural, Os trens turísticos de Galicia, e os produtos enogastronómicos De tapas por Galicia e as Rutas do viño.

Por último, a directora de Turismo de Galicia achegoulles aos operadores turísticos de Arxentina algunhas das cifras turísticas da comunidade galega, salientándolles o incremento do volume de viaxeiros aloxados nos establecementos regrados de Galicia o pasado mes de agosto, o que supuxo un 6,7% de suba, ata situarse nos 780.000 viaxeiros.

Estes datos, segundo apuntou Nava Castro, marcaron un máximo histórico na comunidade galega, superándose os niveis de ocupación, incluso de anos santos anteriores.