O Tren Termal e do Camiño do Norte que une A Coruña e Lugo realiza o seu primeiro percorrido Escuchar
Esta nova ruta, promovida por Turismo de Galicia, inclúe unha sesión termal no Balneario de Guitiriz, un percorrido por un tramo do Camiño do Norte e unha visita ao centro histórico de Lugo
É un dos nove itinerarios temáticos que percorren Galicia este verán no marco da cuarta edición de ‘Galicia a todo tren’
Esta actividade repetirase o día 22 de outubro e pechará o programa dos trens turísticos de Galicia do ano 2016
O Tren Termal e do Camiño do Norte, unha das novas incorporacións deste ano ao programa dos trens turísticos ‘Galicia a todo tren’, fixo o seu primeiro percorrido entre as cidades da Coruña e Lugo, nunha viaxe que contou coa participación da directora de Promoción de Turismo de Galicia, Carmen Pita.
O itinerario inclúe a viaxe en tren entre A Coruña e Lugo, con parada en Guitiriz, para que os viaxeiros poidan gozar dunha sesión termal no Balneario de Guitiriz así como un percorrido a pé por un tramo do Camiño do Norte que inclúe a visita á capela de Santo Alberte.
Logo, os pasaxeiros trasládanse á cidade de Lugo, onde poden achegarse ata a Muralla e ao casco histórico da cidade, con visitas ao Centro de Interpretación da Muralla e á Casa dos Mosaicos, antiga Domus romana.
Este mesmo itinerario volverá repetirse o vindeiro 22 de outubro pechando o programa dos trens turísticos de Galicia do ano 2016.
Galicia a todo tren
O Tren Termal e do Camiño Norte é unha das novidades da cuarta edición deste programa, sumándose así a outros oito itinerarios temáticos que percorreron a Comunidade galega desde o pasado mes de xuño: A ruta dos Faros, entre Ferrol y Ribadeo; a dos Pazos e xardíns históricos, entre Santiago e Vigo; e as cinco Rutas do Viño que percorren as zonas das Rías Baixas, Ribeira Sacra, Ribeiro, Monterrei e Valdeorras. Ademais do Tren da Ruta da Lamprea e o viño do Condado, novidade tamén nesta edición.
O programa ‘Galicia a todo tren’ é froito da colaboración entre a Xunta, a través de Turismo de Galicia, a compañía RENFE e a Deputación de Ourense, a través do Instituto Ourensán de Desenvolvemento, INORDE.
Nesta nova edición ademais de incluír novas rutas, incrementouse a oferta global en 84 novas prazas grazas aos bos resultados da edición anterior que rexistrou unha ocupación do 87%.
A oferta deste programa completouse un ano máis co ‘Tren Peregrino’ o ‘Tren dos Balnearios’ e o programa ‘Galicia Rail Pass’, a través dos que os visitantes á Comunidade galega puideron gozar de importantes vantaxes á hora de reservar os seu billete para percorrer Galicia en ferrocarril.
