A exposición “Galicia, Casa dos Peregrinos” superou as 2.500 visitas nos seus primeiros dez días. A mostra, inaugurada o pasado día 2, estará aberta ao público ata o vindeiro 29 de xuño no Colexio de Fonseca, en Santiago de Compostela.

A mostra forma parte da programación especial de actividades que Turismo de Galicia puxo en marcha con motivo do Ano Xubilar Extraordinario da Misericordia, que supón un fito histórico para o Camiño de Santiago e para a Comunidade galega xa que, por primeira vez, se abriu a Porta Santa da Catedral nun ano non Santo.

A exposición afonda na restauración do patrimonio cultural, a celebración de eventos como os Anos Santos ou os anos de especial interese e o traballo realizado en colaboración coas numerosas Asociacións de Amigos do Camiño de Santiago, espalladas por todo o mundo. Tamén aborda aspectos da colaboración con outros itinerarios culturais de Europa como o Kumano kodo ou o Camiño de Shikoku.

Así mesmo, pon en valor a dimensión internacional que supón a peregrinación xacobea e invita a reflexionar sobre a recuperación dos Camiños de Santiago en Galicia. Tamén reflicte cuestións relativas á creación da rede pública de albergues, conformada na actualidade por un total de 70 establecementos e que materializa a solidariedade e hospitalidade xacobea.