Un grupo de 60 operadores turísticos, entre os que se atopaban os máis importantes do centro do territorio de Chile, participaron na cidade de Concepción nun workshop organizado por Turismo de Galicia ao obxecto de difundir a oferta turística galega neste país. Ademais, o departamento de Turismo da Xunta xa desenvolveu esta actividade formativa na cidade arxentina de Neuquén.

Deste xeito, a Universidade de Concepción acolleu un acto de presentación da oferta turística galega no centro do territorio chileno, a través dunha reunión de traballo á que lle seguiu  un curso de capacitación no destino que lles impartiu Turismo de Galicia aos axentes asistentes.

Nesta última actividade formativa, os operadores turísticos chilenos puideron coñecer máis de preto a oferta, os produtos e os servizos turísticos galegos, así como o xeito máis directo de contratalos para a organización de viaxes con destino á Comunidade galega.

Xuntanzas en Arxentina
Dentro deste programa de presentacións da oferta turística galega no sur de América, a Xunta, a través de Turismo de Galicia, organizou outra xuntanza de traballo e un curso de capacitación no destino na cidade arxentina de Nouquén.

Neste caso, participaron máis de 40 operadores turísticos locais e das rexións do centro do país, que tamén tiveron a oportunidade de coñecer a fondo as características do turismo de Galicia.

Exposición ‘Galicia. Imaxes da vella Europa’
Por outra parte, neste primeiro semestre do ano, as accións de promoción do turismo galego nos países do sur de América complétanse coa exposición fotográfica sobre os recursos turísticos galegos ‘Galicia. Imaxes da vella Europa’, unha colección de 51 fotografías propiedade de Turismo de Galicia que se inaugurou o pasado 10 de xuño na cidade arxentina de Rosario, logo de pasar por Córdoba e Mar del Plata en maio e abril, respectivamente.